القراءه للحياه والمخدرات للموت

سعدت جدا الصيف السابق بالاهتمام بالقراءه عن اى سنه مرت سواء بالافتات فى الطرق والاعلانات فى التلفزيون
فكانت دعوه جميله للتشجيع على القراءه وكلما نظرت فى اى مكان شاهدت هذه اللفتات الجميله
فالقراءه للحياه فعلا لان الانسان الذى لايقراء انسان ميت كما أن القراءه بتضيف كتير للشخصيه وتساعد الانسان ان يكون ناجح فى حياته سواء العمليه أو الشخصيه لانها بتساعد الانسان على فهم حاجات كتير فى حياته والتفكير بالشكل الصحيح وتساعده على اتخاذ قرارات حياته بشكل صحيح الا حد ما
فنحن محتاجين فعلا أن نقراء فى اى مجال لان القراءه ممكن تغير حتى فى السلوكيات الناس مع بعض اللى بنشوفها فى المواصلات والشوارع إلى الاحسن
والقراءه هى السلاح الذى نستطيع أن نحارب بيه أعدائنا اللى عاوزين يخربوا عقول شبابنا المستهدف وتنور لهم طريقهم
سواء كان وسيله التخريب عن طريق المخدرات أو قنوات الفيديوا كليب على الدش وغيرها من القنوات أومواقع معينه على النت لان سواء النت والدش هم اسلحه ذو حدين حد مفيد وحد أخر مدمر جدا للعقول وغيرها من وسائل التخريب
والقراءه لاطفالنا فعندما نقراء لهم وهم صغار ونعودهم على أن الكتاب هو خير صديق نكون كده بنساعد فى بناء شخصيتهم للافضل
أتمنى أن كل المصريين يقرائوا بمختلف الاعمار لان القراءه حياه والكتاب خير صديق والكنز الحقيقى لاى انسان
وللقراءه فوائد كثيره لايمكن حصرها وان تكلمت على بعض منها وليس كلها

سعيده جدا بهذه الدعوه للقراءه وكم حلمت وتمنيت بدعوه مثل هذه الدعوه ولكن ضد المخدرات
لانى حزينه جدا على انتشار المخدارات فى بلدنا
كان ايام زمان اللى يتعاطى المخدرات ده الانسان الفاشل او الشخصيه الغير سويه واللى بتكون منبوذه من الناس
ولكن اليوم ظاهره غريبه جدا معظم الشباب يتعاطى المخدرات وممكن يكون شخصيه ناجحه وكمان ممكن يكون متدين بس يقولك دى حاجه بسيطه ممكن أتوقف عنها فى أى وقت أو يكون بيتعاطى بس فى المناسبات لما حد يعزم عليه
والاغرب بقه الجمله اللى انتشرت هذه الايام على وجود درجات فى تعاطى المخدرات يعنى البانجوا ده عادى وكل الناس بتخده لكن الهيروين ده الغلط وراى اخر يقول الهيروين المغشوش بس هو اللى غلط لكن الغالى أو النظيف لا مش غلط ولا الحكمه الغريبه ان خلاص كل الناس بتاخد مخدرات وكمان فى ولاد ناس أوى وناجحين وبرده بيتعاطوا

انا بجد مصدومه فى الكلام ده واللى بسمعه من مصادر عديده من صديقاتى وزمايلى انا لولا انى واثقه فى المصدر ان الشخصيه اللى بتحكى مش بتبالغ أو شخصيه مروجه للشائعات كنت قلت ده كلام كذب وأشعات
المخدرات هى المخدرات بمختلف دراجتها والمبادىْ مش بتتجزا يعنى مينفعشى اكون ضد المخدرات وحد يعزم عليا فى مناسبه فاخد عادى دى جريمه فى حق المتعاطى وفى حق المجتمع وحاجه تشين اى حد سواء خد كتير او قليل منها
والكارثه الكبرى هو انتشار المخدرات فى الافراح الشعبيه تقريبا وفى المحافظات كنوع من الترحيب بالناس
كما انها محرمه فى الدين ومن الكبائروباجماع الفقهاء
بسم الله الرحمن الرحيم
يا أيها الذين آمنوا إنما الخمر والميسر والأنصاب والأزلام رجس من عمل الشيطان فاجتنبوه لعلكم تفلحون" "إنما يريد الشيطان أن يوقع بينكم العداوة والبغضاء بالخمر والميسر ويصدكم عن ذكر الله وعن الصلاة فهل أنتم منتهون ) صدق الله العظيم هكذا نزلت الآيتان الكريمتان في سورة المائدة وقد أجمع علماء المسلمين يوم ظهرت هذه الآفة على تحريمها ولم يشذ عن ذلك فقيه من الفقهاء لا مذهب من المذاهب، كلهم أقروا حرمتها فهي حرام بل هي كبيرة
والحمد لله انى ماقبلتش فى حياتى حد ناجح ومتدين واخلاق وأكتشفت بعد كده أنه مدمن أو مدمنه أو حتى تعاطى المخدرات ولو مره واحده حتى فى حياته بجد انا ممكن يغمى عليا أو افقد ثقتى فى كل اللى حوليا
انا مش عارفه أزاى حد يكون ناجح أوشخصيه كويسه وبيتعاطى المخدرات انا حزينه جدا نفسى ابكى على شباب بلدى اللى زى الورد الناجحين ومدمنين وحزينه على الانتشار الفظيع للمخدرات بين كل الشباب
أما الشباب الفاشل والناس اللى هما شياطين الانس انا مش حزينه عليهم انهم مدمنين لانها جزء من تركيبه شخصيته وصفه عاديه فيهم
لكن حزينه كل الحزن على الشباب الناجح والشخصيات الكويسه
نفسى اسألهم سؤال واحد

ليه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
فى مثل عربى بيقول من لديه صحه لديه أمل ومن لديه أمل فقد أمتلك كل شىء
قد ايه الصحه حاجه غاليه أوى ونعمه كبيره أزاى الانسان يدمرها بسهوله كده لان اللى عنده صحه ممكن يحقق كل طموحاته واى شىء بيحلم بيه وقد ايه المخدرات ممكن تقتل اى حاجه جميله فى حياة الانسان
اتمنى ان دعوه القراءه للحياه تتكرر بس تكون ضد المخدرات وتكون فى لافتات فى كل مكان ضد المخدرات وتوضح للشباب ان المخدرات ديه حاجه ضاره وجريمه وكمان بتشين اى انسان بيتعاطها

واتمنى ان يشارك التلفزيون فى هذه الحمله وكمان كل واحد منا مصرى عنده حد صديقه اوجاره أو أى حد يعرفه بيتعاطى المخدرات ولو حتى فى المناسبات بس اواى سبب فارغ من هذا القبيل أن ينصحه ويشارك بقليل من الجهد فى هذه الحمله عشان لو قللنا حجم متعاطى المخدرات ممكن نمنع تجار هذه السموم من انهم يدخلوا هذه السموم بلادنا لم يلاقوا مفيش سوق ليها فى بلادنا فالمخدرات للموت
واخيرا اسفه على اسلوبى لانى ضعيفه فى الكتابه شويه وانا فى انتظار تعليقاتكم ومناقشتكم لهذا الموضوع