Tuesday, October 16, 2007

ماما نونا


ماما نونا

الشخصيه الجميله التى اسعدتنا بيها الفنانه الكبيره كريمه مختار واللى جعلتنا كلنا نشعر فيها بحنان امهاتنا خصوصا ان المؤلف يوسف معاطى كتب الشخصيه بشكل رائع للأم الحنونه لدرجه التدليل بكل التفاصيل الصغيره للشخصيه التى تجعلنا كامشاهدين ننسى انها بتمثل

وكاننا نشاهد فعلا والدة حماده عزو والتى جسدتها ببراعه الفنانه كريمه مختار فاضافت للشخصيه المكتوبه والمخرج الرائع للعمل مجدى ابو عميره كلهم ساهموا فى ان تظهر لنا ماما نونا بالشكل الذى جعلنا كمشاهدين نرتبط بيها جدا وكانها شخصيه نعرفها وقريبه منا لدرجة ان نحزن عليها عند موتها وتدمع عيننا عشان حسينا انه خلاص مش حنشوف ماما نونا تانى

ولاننسى الدور الذى فاجئنا بيه الفنان العبقرى يحيى الفخرانى ورغم ان الكثير كانوا ضد هذا الدور لاننا اتعودنا أن نرى الفنان يحيى الفخرانى فى الشخصيه المثقفه والمثلى وصاحب المبادىء الا انى كنت سعيده بدوره هذا لان الفنان الجيد هو الذى يستطيع القيام بكل الادوار وكمان هو بيمثل شخصيه موجوده فعلا فى الواقع ومثلها بشكل جميل جدا وبجد هو بينور الشاشه دايما فى رمضان

اما شخصيه داليا فكانت الفراشه الرقيقه بتاعت المسلسل وبصراحه معتقدشى ان حد كان ممكن يعمل هذا الدور غير الفنانه هنا شيحه بهذا الوجه البرىء والشخصيه التلقائيه والمحتفظه بروح الطفوله جوها .كانت معبره جدا عن شخصيه داليا اللى بتحب الكل ومش بتشيل حاجه جوها ناحيه حد حتى والدها الذى لم يفكر فى اولاده ومكنشى بيفكر الا فى نفسه ورغم عدم حب كل ابنائه له الا ان داليا بقلبها الى مبيعرفشى غير الحب كانت بتحبه وعلى صله دائمه بيه خصوصا فى اول حلقه وحرصها على حضور عيد ميلاده والاحتفال بيه وسط الاطفال انا عجبنى المشهد ده اوى دليل على حبها الشديد لوالدها رغم كل شىء 0 وكمان مشهدها مع الفنان يحى الفخرانى لما سالها ليه رفضت العريس اللى مامتها موافقه عليه رغم انه مستوى مادى وموصفات ممكن تلفت نظر اى بنت فقالت له (انا عاوزه واحد مجنون زى) وقالت له انها عاوزه شخصيه زى الولد الرسام اللى بيشتغل مع والدها اللى هو شادى . عجبنى جدا الشخصيه المكتوبه اللى رغم وجود روح الطفله جوها الا انها بتقدر تفهم الشخصيات وتدخل فى عمقها حتى ولو كان مظهرها بيخدع كل الناس معادله صعبه ان الواحد يجمع بين النقاء والتلقائيه والطيبه والحب وانه يكون برده بيقدر يختار ومينخدعشى فى المظاهر الكذابه ويقدر يوصل لاعماق الشخصيه مهما كان مظهرها مش بيدل عنها خصوصا أن شادى ظهر فى الحلقات الاولى بابيجامه وذقنه اللى مش بيحلقها يعنى مش بيعكس خالص انه ممكن يكون شخصيه ممكن تلفت نظر حتى بنت عاديه مش بنت زى داليا فى مستوها الاجتماعى

ولا ننسى الفنانه نهال عنبر ودورها الجميل فى المسلسل

اما اخر حلقتين فى المسلسل بصراحه مش لاقيه كلمات تعبر عن مدى اعجابى بيهم وقد ايه الفنان يحيى الفخرانى اداهم بعبقريه مذهله تجعلك تعيش مع هذه اللحظات وعدم تصديقه لموت ماما نونه ورفضه للكلام واحساسه بان الحياه خلاص وقفت وخروجه للمشى فى الشوارع بلاهدف ومشهد أكله للبليه فعلا عبر عن انسان كانت كل حياته ولدته وبس . وتفكيره فى عمل عروسه تشبه لها وبتلبس زيها وان يضع الوكمن جوها عشان يسمعها وهيه بتكلمه بجد مشهد رائع من المؤلف اللى كتب القصه واتقان يحيى الفخرانى للمشهد لان اى حد بيفارق شخص قريب منه خصوصا الام بيبقى نفسه يعمل كده لانه مش بيبقى مصدق انه مش حيقدر يشوفه تانى ولا يسمع صوته خصوصا لو كان هذا الشخص المتوفى هو كل حياة الانسان وقدته الفنان يحيى الفخرانى انه من بعد ماما نونا مبقاش بيضحك نفس الضحكه اللى كان بيضحكها لما كانت موجوده مهما فرح بصراحه مش عارفه اقول او احكى ايه ولا ايه على جمال أخر حلقات المسلسل . بس بجد قدرت تخلى كل الناس اللى شافوها يدمعوا كانها حقيقه مش تمثيل

كانت معبره جدا من غير اطاله فى الاحداث وبها معانى رقيقه جدا بحيث قدرنا كلنا كمشاهدين نحسها أوى

وأخيرا عمل ناجح ورائه فريق عمل ناجح وهم المؤلف والمخرج والمثلين واسفه جدا على الاطاله


10 comments:

rack-yourminds said...

للاسف انا في رمضان متبعتش غير مسلسل او اتنين مش من ضمنهم مسلسل يحي الفخراني بس يبدو لي من كلامك انه مسلسل جميل جدا

ثانيا بجد تحليلك للمسلسل جميل جدا واسلوبك وطريقة عرضك للموضوع أجمل

تحياتي لكي وانا سعيد بمعرفة مدونتك

غمض عينيك said...

والله يامنى انتي لخصتي الشخصيات الاساسية في المسلسل بطريقة جميلة

وكله كوم والشعنونة المجنونة داليا عزو كوم تاني

بجد كانت شخصية تحفة كلها شقاوة وكمان حنية

وكمان اعتقد ان اسم ماما نونا هيفضل مرتبط بكريمة مختار رغم تاريخها كله

بس بجد هي ابدعت في المسلسل ده


بجد كان حلو جدا

تحياتي

Anonymous said...

البوست والله حلو وبجد الى مشافش المسلسل رغم انى مش مقتنع انى محدش شافه يقدر يعرف الشخصيات من رسم ليها وتعبيرك عنها تحياتى

نبضات said...

rack-yourminds
شكرا على تعليقك وزيارتك للمدونه
وخساره انك مشفتش المسلسل عموما هو اكيد حيتعاد تانى
بالنسبه للتعليق انا سعيده انه عجبك عموما هو مسلسل جميل جدا وكل اللى مثلوا فيه ابدعوا حتى اللى معلقتش
عنهم انا اتكلمت بس عن الثلاث شخصيات اللى تركوا عندى بصمه وكانوا شخصيات مؤثره فى المسلسل وبصراحه تعليقى ميجيش حاجه بجانب انك تشوف المسلسل وتحس المعانى الجميله اللى جواه واللى مقدرتش اعبر عنها كلها
وشكرا على مدحك فى تعليقى دى شهاده انا اعتز بيها وانا اسعد بمعرفتك
غمض عينيك
ربنا يخليك وشكرا على تعليقك
وانا برده موافقاك الراى ان شخصيه ماما نونا حتفضل مرتبطه بكريمه مختار رغم تاريخها كله الا انها حاجه اضافت ليها برده وبصراحه لازم تاخد عليها جائزه وتكرم عليها وكفايه انها خلتنا ننسى انها بتمثل وكل اللى شاهدوا المسلسل حسوا كانها حقيقه
واستمتعوا بادائها الرائع ربنا يديها الصحه وطوله العمر
اما شخصيه داليا فعلا كانت الفراشه الرقيقه للمسلسل وكانت فعلا شقيه وكلها بهجه وطفوله
انا عموما بحب هنا شيحه عشان وجهها الطفوله والضحكه الجميله التى لاتفارقها وتلقائيتها
رئيس جمهوريه نفسى
سعيده بزيارتك للمدونه نورتنى وسعيده ان التعليق عجبك وان القصيده عجبتك ايضا
وشكرا على التعليق الجميل

بيجاسوس المصرى said...

اولا الف مبروك على دخولك عالم التدوين و اتمنى ان شاء الله المتابعة و الاستمرار بكتابات تمتعنا بأذن الله

المسلسل بصراحة كان فى قمة الجمال و خاصة انه كان يشير الى عده رموز مختلفة
تختلف هذه الرموز من شخص الى اخر و لكنها تجتمع فى اطار واحد و معنى واحد بالرغم من هذه الكوكبة الرائعة الا انى اوجه التحية الى الكاتب الكبير يوسف معاطى الذى استطاع و ببراعة ان يقلب مجريات المسلسل فى لحظة و بكفاءة كاتب ماهر
تحياتى

نبضات said...

بيجاسوس المصرى شكرا على زيارتك للمدونه ونورتنى
بخصوص المسلسل هو فعلا بيشير إى رموز مختلفه وانا عارفه ان فيه معانى سياسيه وكمان دور نهال عنبر دور جامد جدا وبيقول حاجات كتيره حقيقه
انا بس ان تكلمت على المسلسل من وجه نظر واحده هى شخصيه ماما نونا عشان الشخصيه دى اثرت فينا كلنا عشان كده سميت البوست مامانونا وليس يتربى فى عزو بس وانا بكلم على ماما نونا مقدرتشى ماذكرشى الفنان العبقرى يحيى الفخرانى والفنانه الرقيقه هنا شيحه وعبقريه المؤلف والمخرج للعمل وان كان يحمل معانى عديده ومنها مفهوم انا نسيت اذكره وهو انه رغم تدليل ماما نونا لشخصيه حماده عزوا وكانت بتتغضى عن الكثير من اخطائه الا انها لم تتحمل صفه الخيانه لما كان عاوز يخون بلده اولا والانسانه الى استضفاته هو ولدته فى بيتها وكانت اول مره تلومه وتضربه بالالم ونتيجه لتاثرها بالموقف و كان احد اسباب وافتها وعلى فكره المعنى ده من المعانى الجميله بمعنى انها استحملت كل اخطائه بس عند الخيانه ومقدرتشى تطبطب عليه زى كل مره لما كان بيغلط
عموما العمل الفنى زى اللوحه الزيتيه كل واحد بيبصلها من زاويه معينه تختلف عن الاخر
تحياتى وسعيده بزيارتك

سابرينا said...

فعلأأخر حلقتين
كانوا أكتر من رائعين
لأن الحلقات الل5 اللي قبلهم
خلوني أتخنقت من حماده عزو!!
عيد سعيد!!!

نبضات said...

شكرا ياسبرينا على تعليقك وزيارتك للمدونه
وكويس شعورك بالخنقه ناحيه حماده عزو لانه دليل على ان الفنان يحى الفخرانى نجح فى اداء الدور
سعيده بمعرفتك
تحياتى

Unknown said...

انا ما شفتش المسلسل الحقيقة بس تصورى أنتى خلتينى أفكر أشوفه لما يتعاد

نبضات said...

عاليا حليم
انا سعيده ان تعليقى قدر يخليكى تفكرى تشوفى المسلسل . رغم ان ناس كتيره معجبهاش المسلسل بس بصراحه ياعاليا حتستمعى بيه سواء بحنان ماما نونا وبعبرقيه يحى الفخرانى وبرقةوتلقائيه وبهجة الفراشه هنا شيحه وكمان ببراعه الكاتب للمسلسل وباقى الابطال برده ابدعوا بس انا اتكلمت على الناس اللى سابت بصمه كبيره جويا
فى انتظار رايك بعد مشاهدة المسلسل
تحياتى لك