Thursday, April 3, 2008

حب فى الشتاء وطبول الربيع




فى هذه الايام تحتفل الطبيعة بقدوم الربيع حيث تتلون بالالوان الزاهيه وتولد الطبيعة من جديد تخضر اوراق الشجر التى جفت وتساقطت وتتفتح الزهور وتكتسى الاشجار بالورود مختلفة الالوان ، تقترب الشمس أكثر وتصبح أشعتها أكثر أشراقا وايامنا اكثر دفئا فتظهر الطبيعه وكانها لوحة زيتيه مرسومه بل اجمل اللوحات لانها من خلق الخالق العظيم


أنه الربيع ...الذى لايخلف موعده مهما طالت ليالى الشتاء و ومهما سيطرت على قلوبنا الاحزان ياتى ويلون الكون
بألوان الحب والتفائل ورغم كل هذا الجمال الا أن فصل الربيع دائما يصاحبه معى لمسة حزن داخليه لانتهاء فصل الشتاءوافتقادى لهذا الفصل بصفتى كائنه شتويه اعشق فصل الشتاء بشمسه الدافئه وزخات مطره الصافيه مثل قطرات الندى فى الصباح والذى لايمنعنا طقسه البارد من الاحساس الداخلى بالدفىء فالشتاء بارد لمن لايملكون قلوب مليئه بالحب والاحساس وذكريات الحياه فهو رمزا من رموز الرومانسيه والدفىء ولغه من لغات الحب اذا اردنا ان نتكلم عنه


ويذكرنى قدوم فصل الربيع بشعور متزامن معه بالخوف لذكرى دائمه فى خيالى لانه كان دائما ياتى مع قرب الامتحانات
وبدء الاستعداد لها فأول ماتبدء الزهور فى التفتح والاشجار تكتسى بالورود كلها علامات عندى لقرب الامتحانات عندما كنت طالبه فى الدراسه ورغم انتهاء دراستى الا انى مازلت اتذكر هذا الاحساس داخلى كلما اتى الربيع


ايام الربيع هى افضل مناسبه لتجدد الامل والتصالح مع النفس والاخريين وليكن ميلاد جديدا تماما لنا مثلما تفعل الطبيعة
فهى دعوه مفتوحه تاتى مع قدوم الربيع لكل البشر للتخلص من الكابه والاحزان والتخفف من الاعباء والضغوط ومشاكل الحياه التى تسرق الابتسامه من على الشفاه ولو لبضعة ايام نتذكر فيها انه مهما ضاقت بنا ظروف الحياه لابد لها ان تنفرج ومهما اشتدت ألام الجروح لابد لها أن تشفى ،وتلتأم المهم ان نساعد انفسنا على نسيان كل ماأتى موعد نسيانه

فقط علينا ان ننظر للجمال من حولنا فى كل شىء فى الطبيعه وفى كل شىء فى الحياه ولنتغاضى عن القبح
واذا كان هناك كذب وخداع وخيانه ونفاق وانانيه وقسوة فى قلوب البشر ، الا أن هناك ايضا الصدق والحب والوفاء والاخلاص والحنان والعطاء بلا حدود فمع المر هناك الحلو ولكن علينا ان نبحث عنه طوال حياتنا ونتمسك بيه عندما نجده ونفسح له داخلنا وفى قلوبنا المكان الذى يستحقه



واحتفالا بعيد الربيع ...يقام معرض لزهورالربيع هذه الايام فى حديقة الاورمان بالجيزه وحتى 22 ابريل الحالى والذى يشارك فيه العديد من الشركات العارضه والمشاتل لمحبى اقتناء الازهار والنباتات او من يرغب فى اختطاف وقت جميل
فى نزهه فى هذا المعرض لتتمتع بالوان الطبيعة فى الربيع



نبضـــات



44 comments:

MONDAHESH said...

جميل قوي ان يكون عندك ارتباط ذهني بين حاجتين

بس الربيع والامتحانات صعبة شوية


ده كده تكرهي الربيع


تحياتي

mohand said...

الربيع بيحسسك بالراحه النفسيه


انا بحب الربيع

صاحب المضيفة said...

وصف جميل لفصل جميل أيضا

دمت بود

سنووايت said...

الربيع فصل الالوان
اجمل الوان ممكن تشوفها عيني في الربيع
سبحان الخالق
حسيت بالربيع في كلماتك
بس يا خسارة مش هاعرف اروح المعرض :(

fatima said...

نبضات
يا عرافتى الساحرة
عارفة صلح جاهين بيقول إيه ؟
مايو يونيه يوليه
موسم
امتحانات
ليه بتحلوى يا دينا
فى الوقت دا بالذات ؟؟
حاجة كمان احنا مشتركين فيها ..انن مخلوقات شتوية تعشق الدفء و الشجن الذى يبعثه المطر ...
و كعادتك بوستاتك تشف شخصيتك ...
طفلة جميلة رقيقة تبتهج بقدوم البيع و الورد و أى مناسبة مفرحة
أنا متهيألى انى لو غمضت عيونى و تخيلتك ...
هشوف بنوتة بمريلة المدرسة عاملة شعرها فيونكتين و ماسكة فى ايد مجلة ميكى و فى الايد التانية مصاصة ملونة بالوان القوس قزح ..
و بتضحكى لكل حد يبصلك ضحكة جميلة و شقية ....
دايما جميلة و مبهجة يا نبوضة
قلبى بيحبك اكتر بكتير

نبضات said...

مندهش
شكرا على تعليقك بس كان ليا تعليق على تعليقك يعنى انت مش لاقيت حاجه فى البوست تعلق عليها غير الامتحانات البوست كله مش فيه حاجه جميله ممكن تحببك او تحسسك بالربيع !!! زعلانه جدا
وانا بحب الربيع حتى ولو كنت بحس معه ببعض ذكرى الخوف مش بكره ولا مش كنت كتبت هذا البوست عنه

تحياتى
دائما منورنى

مهند
الربيع دعوه للتجدد والتصالح مع النفس والاحساس بجمال الكون حولنا
وانا كمان بحب الربيع ويارب تكون كل ايامك ربيع

تحياتى
دائما منورنى

نبضات said...

صاحب المضيفة
شكرا على كلماتك ويارب تكون كل ايامك فصل ربيع دائما بتنورنى

تحياتى

سنووايت
الربيع فصل اللوان تعبير عميق ورقيق
سعيده ان كلماتى قدرت تحسسك بالربيع وانا نفسى شكلى مش رايحه المعرض السنه ديه عشان مشغوله جدا بس اتمنى اختتطف بعض الوقت واروح

تحياتى
دايما منورنى

نبضات said...

فاتيما
صديقتى العزيزه والغاليه فى عالم التدوين مش لاقيه كلمات تعبر لك عن انذهالى لما قرات تعليقك كنت سعيده به جدا وحسيت كانك تعرفينى لانك وصفتينى وصف دقيق اولا انا شخصيه اميل الى الطفوله رغم كبر سنى وبحب مجلة ميكى موت وتعلقت بيها الى ان انتهيت من فترة اعدادى والمصاصه بحبها لدرجه ان قيس اللى كتبت عنه فى البوست اللى قبل اللى فات اللى كنت ساخطب له دايما يجبلى مصاصه فى جيبه اما الابتسامه فهى صفه مميزه لى مهما كانت الضغوط وناس كتير بتعلق ليا على وجههى المبتسم دائما
سعيده بكلماتك وابحارك فى شخصيتى والتى اشعرتنى كاننا نعرف بعض وتعليقك فوق الرائع عجبنى جدا
وسعيده ان احنا مشتركين فى كوننا كائنات شتويه مثلما نحن مشتركين فى اشياء اخرى كثيره جداااااااا
سعيده بصادقتك الافتراضيه وربنا يدمها طول الحياه ويارب كل ايامك تكون ربيع لانك ورده جميله فى بستان التدوين

تحياتى
قلب بيحبك دائما

MONDAHESH said...

زعلانة ازاي ؟؟؟

!!!!!!!!!!!!


والله ماقدرش

انا مش قصدي والله وأسف


البوست كله اصلا عاجبني

حتي اهتمامك بالمعرض اللي تقريبا ماحدش يعرف عنه حاجة لفت انتباهي

ومش قصدي والله اني اعلق علي جزء

واتجاهل التعليق علي باقي البوست

§a§a said...

انا بكون فى حاله من الملل لما بينتهى الشتاء لانى بحب الشتاء جدا جدا
ولاسف مش بقدر اتكيف مع الصيف

بس طبعا لاربيع بيكون فصل جميل جدا
وانا كنت شوفت من فترة كام يوم كدا اعلانات معارض الزهور فى الاورمان

تحياتى

راجى said...

الشتاء والخريف افضل الفصول فى مصر
مدونة جميلة وكل عام وانتى بخير

monaliza said...

الله عليكى كلامك الاخير ده حلو جدا ونصايح غالية احييكى على كتاباتها ولفت النظر لها
اما عن الربيع فانا بستناه مخصوص عشان اشوف الوان الطبيعة بتحسى بقدرة ربنا وتناغم الالوان بجد سبحان الله

زين said...

لأني من مريدي جنينة الأورمان
طبعا اتشديت للبوست
لأن كتير مايعرفوش عن جنينة الأورمان حاجة
وكمان اتشديت علشان من زمان ماحدش حسسني حتى إن الربيع عدا علينا..
واتشديت أكتر بروح الفرح وروح الخوف التي سكنت السطور.. الفرح للربيع الذي يقف شاهدا على الامتحانات
على زملاء المدرسة الثانوية لأني من خريجي السعيدية فكنت بأعدي على الجنينة كل يوم..وده اللي خلاني اسمي الرواية الجديدة بالاسم ده من جانب.. ومن جانب لأن ذكريات الأورمان كثيرة وارتبطت بالطفولة والجري فيها مع العيال والكورة والصراخ والضحك والمقالب والعفرته والتنطيط والاختفاء بين الورود
واللهي يابضات أسعدتيني جدا بالبوست ده..
صباح السعادة صباح الربيع عليكي وعلى الكاتبة الجميلة فاتيما
خالص محبتي

houda said...

alah bost rai3 jidan fi3lan fasli rabi3 min afdal ilfosol byitmayiz bijaw hayil ou alwani tabi3a ili bitkhali linsan ytkhalas min kaabto ou homomo 3la fikra ana iktachafti hobik lifasli chita ili ba3cha9o awi ana mitaf9a ma3aki ili byhisi bilbardi fiha liano mafihch ihsas aw hob ykhalih dafi raghmi lbard bost rai3 wlahi inta fakra koli lmonasabat machallah 3alik
tahiyati lihada alwasf aljamil

مفقوعة مرارتي من حماتــــــــــــي said...

انا رحت حديقة الأورمان قريب عشان المعرض
بجد رائعة وتنسيق الألوان فيها يعبر عن الإبداع
انا روحتها اول يوم اتفتحت فيه
مالهاش حل بجد

عاليا حليم said...

أيه ده يا منى ؟ نسيم الربيع طالع من البوست يا عزيزتى بجد انا بستمتع ببوستاتك الى بتكتبيها على طبيعتك

و حعمل بنصيحتك فى انى أنظر لكل ما هو جميل رغم وجود القبح
و زعلانة عشان معرفتش اروح معرض الزهور الشغل الجديد و مع بابا واخدنى اوى انتى عارفة و تعبونى خالص هانت كلها يومين اروق ان شاء الله

الصور جميلة أوى أختيار رقيق

حبى و تقديرى

احساس لسه حى said...

عزيزتى

القلوب مش بتفرق معاها اى فصل تعيش فيه اللى يفرق معاها

انها تلاقى حد تعيش معاه

حد يستاهل تعيش معاه

ربيع سعيد عليكى

سلام

Anonymous said...

ربيع بالنسبالى
يعنى تراب ورياح وجو متقلب
خماسين وحبوب لقاح بتطير عشان تعمل حساسيه
هو فيه أحلى من فصل الشتا
ببرده الجميل ورائحة المطر على الارض
وابو فروه اللى بتاكليه قدام الدفايه
انا ممكن اصدق صورة الربيع الجميله دى فى اى دوله اوروبيه
ماعندهاش تراب ولا خماسين

علاء سالم said...

السلام عليكم

نفس الإحساس عندي

فأنا من عشاق فصل الشتاء بأمطارة وأنوائه وتقلب أحواله .

وكذلك أحب الربيع ومازال ينتابني إحساس القلق من الإمتحانات مع إني مخلص دراسه بقالي 3 سنوات بس شكل الموضوع تأصل فيا .

لكل فصل حلاوته وجماله وإحاسيسه الجميله والسيئة وكذلك الذكريات .

أدام الله علينا وعليكي السعاده في كل الفصول .

shaimaa samir said...

لكل فصل جماله
واحساسه
وقيمته التى يحتاجها الانسان
وارتبط الربيع بالبهجة
لالوانه الزاهية
جزاكى الله خيرا لهذة الدعوة الجميلة
دعوة التصافح مع النفس

ومعرض الزهور راائع
واسعاره اروع

shaimaa samir said...

معذرة
لم اقرا التعليقات
فتعليقى يشبه الذى قبلى

فقررت ان اضيف

انى احبك فى الله
واتشرف بمرورى عندك
لسماع نبضاتك

تحياتى

الحشرى said...

كل سنة وأنتى طيبه


وربنا يسعدك أختى الكريمة

زين said...

حبيت بس أعدي هنا وأقولك شدي حيلك في امتحانات الدراسات العليا وربنا معاكي
خالص تحياتي

شهرزاد said...

الربيع هى افضل مناسبه لتجدد الامل والتصالح مع النفس والاخريين وليكن ميلاد جديدا تماما لنا مثلما تفعل الطبيعة
وأنا قبلت دعوتك
أتمنى أن تكون أيامك جميعا ربيعا وورودا تسمتعين بمنظرها الخلاب وعبيرها وأشجارا ظليلة من حرقة الأيام
دمتِ بكل الود والياسمين

جسر الحياة said...

حبيبة قلبى نبضات,بحبك جدا جدا و أعتبرك رمز النفاء فى هذا العالم ,أهم ما يميز مدونتك النــــــــــــــــقــــــــــــاء الطاغى على كل نبضاتك .أحبك بعدد نبضات القلب

SHATSY2005 said...

اول مرة حاقولك يا نبضات دايما تكلمينى عاليها لكن اول مرة انديكى بيها طبعا اول ماتشوفى التعليق حتقولى ادة مين دية وحتفكرى وانا اخر واحدة حتفكر فيها عشان انتى عارفة انى مش بدخل المدونات غير لما انتى تنادى عاليا وتقوليلى اقرائى الموضوع الجديد دة.
انا حبيت اقول انى مفتقدة الكلام معاكى قوى والجلوس معاكى كل يوم الساعة 9 وربع وانت عارفة لية الميعاد دة بالذات ونعد نحكى فى كل حاجة فى الدنيا وكل اللى بيحصل لينا.
يا ارق وانقى انسانة انا شوفتها فى حياتى ومن احن الناس اللى موجودين فى الدنيا.
يا اكثر انسانة تهتم باحساس الاخرين وممكن ترجع تندم على كلمه قالتها عادية خائفة من ان تكون جرحت مشاعر الشخص الاخر.
انا مفتقدة كل شىء وجلوسنا وخروجنا كل يوم الساعة 12 الظهر لجلب الفطار سوا و ادخل انا اقعد على الكموبيتر وتقوليلى اية مش حتيجى على السفرة(المكتب الاخر الفاضى معظم الوقت).
يا صاحية المشاعر الرقيقة ودايما تساندى اصحابك وانا اكثرهم من ساعدتيه.
مش عارفة اتكلم فى اية ولا اية بجد بس انا حقول بجد انى بحبك قوى وانت عارفة كدة يمكن الايام خالتنا تبعدنا من العمل مع بعض لكن انت عارفة انك حاجة مهمة قوى عندى و حنفضل اصحاب على طول ومتخفيش انا مش حبعد.
ياه ه ه احنا تطلع بينا ذكريات كتير قوى منها المفرح ومنها المحزن.
انا حدخل تانى وحاعلق على الموضوع.
ربنا معاكى فى امتحناتك وشدى حالك.
بحبك وانت عارفة قد اية.

فاتيما said...

نبوضة يا حبيبتى
لما تعودى بألف سلامة من زنقة الأمتحانات
و ان شاء الله مجبوزة الخاطر
عندى ليكى تاج أرجوكى تتقبليه منى و تجاوبيه
أنك تذكرى 10 أشياء عن نفسك
و تمررى التاج ل5 مدونات آخرى مع ذكر السبب لذلك شرط ميكونوش جابوه أصلا قبل كدا
و تحياتى يا حبيبتى
فى إنتظار رجوعك
قلب بيحبك

mohand said...

ارجو المرور علي اخر موضوعاتي في مدونة الباحث عن الحقيقة باسم استفتاء عن الافتاء يهمني رايك
تحياتي

فاتيما said...

أنا بعدى أطمن على المدونة و أشوف الأحوال إيه ؟؟
شدى حيلك فى المذاكرة و ربنا يوفقك و تعودى بالسلامة
تحياتى و قلب بيحبك

عاليا حليم said...

التدوين مفتقدك

راجى said...

كل ربيع وانتى طيبة والربيع القادم انشاء الله تكونى فى بيت الزوجية السعيد

§a§a said...

انتى فين يا نبضات عاوزين نشوف تدويناتك

لعل لمانع خير

houda said...

isalamo 3alaykom inti fin min zaman walahi wahachtina kida bardo tikhodina 3aliki nifsi atamin 3ala hadritik walahi lmodawana min ghirik malhach ayi ta3m yarabi tkoni bkhir ou tirja3i lina bisalama

البنت الشلبية said...

الله على البوست الربيعى
بوست كله ورود وزهور والوان ونسمات هوا

نبضات said...

اعلان هام جدااااا

انا لسه مخلصه اليوم امتحانات الدرسات العليا اللى كانت سبب فى بعدى عن المدونه هذه الفتره طبعا حتقولولى عملتى ايه حقولكم بصراحه عكيت شويه وعجنتلى كام عجنايا فى ورق الاجابه وخايفه جدا وربنا يستررررر

واشكركم جميعا على تعليقاتك اللى اسعدتنى كتير والناس اللى كانت بتزورنى رغم غيابى وكمان الناس اللى قلقت عليا والناس اللى شرفتنى بالزياره لاول مره وصديقاتى فى الحياه سهر ( مدونه جسر الحياه مدونه لسه جديده فى عالم التدوين بس اتنبا لها بمدونه مميزه مثل شخصيتها المميزه ) وريهام وتعليقاتهم اللى كانت مفجاه جميله ليا .. بجد ربنا يخليكوا ليا وانا ان شاء الله سارد على كل التعليقات اللى جاتلى واسفه جدا انى اتاخرت فى الرد عليكم بس بجد وحشتووووووووووووووونى جدا ومفتقداكم جدا ومفتقده التدوين

واشكر صديقتى الغاليه فاتيما على التاج وان شاء الله اول بوست حكتبه حيكون عن التاج وحبيبتى الغاليه هدى شكرا على قلقك عليا وربنا يخليك ليا

ومهند حدخل واقرا موضوعك وحعلق باذن الله عليه

وسارد على جميع التعليقات واحد واحد
بس مش حعرف ارد عليهم مره واحده

تحياتى لكم جميعا
وسعيده بصداقتك وبمعرفتى بيكم

عاليا حليم said...

منى لازم تيجى ضرورى حفلة عيد ميلاد عندليبيات عندى فى المدونة مش حقبل اى اعذار

نبضات said...

مندهش
انا مش اقدر ازعل منك خالص لانك من الناس اللى بعتز بيها جدا بس تعليقك تخيلته حيكون اعمق من كده مش اكتر انا مررت لك التاج واتمنى انك تقبله منى وتجاوب عليه من غير تاخير

تحياتى

مصطفى
انا زيك مش بحب الصيف خالص لدرجه انى دايما بقولهم فى البيت ان بيبقى نفسى اسافر لاى دوله فى العالم اجنبيه او عربيه جوها شتوى معتدل يعنى لحد ماينتهى الصيف فى مصر وكل سنه اقول نفس الجمله لانى بحب الشتاء ومش بعرف خالص اتعامل مع فصل الصيف والدنيا بتبقى زحمه اوى فيه بصراحه فصل مش رومانسى خالص
الربيع ...من الفصول الجميله فعلا واللى محدش يختلف عليه
معرض الزهور اول معرفتى بيه عن طريق ابى لانه بيحب كل سنه يروحه وكنت بروح معاه وبستمتع جدا بيه ومش شرط الناس تزوره عشان تشترى ممكن تروح تتفرج على جمال الطبيعه

تحياتى

راجى

كل عام وانت ايضا بخير وشكرا على كلماتك

تحياتى

نبضات said...

موناليزا
انا سعيده ان فى حد اخدت باله من النصايح الاخيره عشان محدش علق عليها وكل بيعلق على فصل الربيع اشكرك على تعمقك فى البوست بتاعى والربيع فعلا بيشعرنى انا ايضا بقدره الله وجمال خلقه وبقول سبحان الله

تحياتى

نبضات said...

د/ زين
انا بصراحه مش كنت اعرف حاجه عن حديقه الاورمان لحد ماعرفت معرض الزهور
واللى بحرص كل سنه انى اروحه مع ابى ومع اصدقائى بس مش روحته السنه ديه

سعيده ان البوست بتاعى قدر يحسسك بالربيع بجد جمله اسعدتنى جداااا
جميل جدا الذكريات اللى بتحكيها عن حديقه الارومان واضح انك مرتبط بيها جدا انا ايضا يادكتور ساعات بكون مرتبطه جدا باماكن وبحسها قريبه من قلبى لما بيكون ليا ذكريات طفوله فيها او اى ذكريات جميله
كلماتك عن البوست اسعدتنى جدا لان دا الهدف من كتابتى له ان انقل مشاعرى الخاصه بهذا الفصل واحاول ان اشعر كل من يقراء البوست بان يتامل معى ويستمتع ويحس بفصل الربيع

دائما منورنى ودائما تعليقات مميزه يادكتور

تحياتى

نبضات said...

الجميله والرقيقه هدى
فعلا الوان الطبيعه فى الربيع وتامل الناس لها بتساعدهم كتير انهم ينسوا الهموم والمشاكل
جميل انك متفقه معايا فى حبى للشتاء ووجه نظرى فى ان اللى بيحس بالبرد القلوب اللى مش فيها حب واحساس وان الحب عموما بكل اشكاله لما يكون فى قلوب الناس وذكريات الحياه الجميله اللى بنحتفظ بيها مش بتخلينى نحس بالبرد
شكرا على تعليقك وكلماتك الجميله ودايما منورنى بتعليقاتك اللى بنتظرها دائما

تحياتى


مفقوعه مرارتى من حماتى

نورتى مدونتى وسعيده بزيارتك الاولى لها وفعلا معرض الزهور كتير جميل ويابختك انك روحتى لانى معرفتش اروح السنه وافتقدت جدا زيارتى لهذا المعرض الجميل

تحياتى

عاليا حليم

صديقتى الجميله جملتك عجبتنى اوى حسستنى انى نجحت فى تعبيرى عن فصل الربيع بدليل شعورك ان نسيم الربيع خارج منه ويارب تكون ياعاليا كل ايامك ياعاليا ...ربيع وسعاده وحب

حلو اوى انك حتعملى بالنصايح الربيعيه ودائما بنحتاج ان ننظر للجمال فى حياتنا عشان نقدر نكمل فى طريقنا فى الحياه وانه زى مافى قبح فى حاجات جميله

انا كمان ماروحتش المعرض ان شاء الله نروحه معا السنه الجيه

وشكرا على تعليقك على الصور المختاره

تحياتى

نبضات said...

احساس لسه حى
القلوب مش بتفرق معاها اى فصل تعيش فيه اللى يفرق معاها
انها تلاقى حد تعيش معاه
حد يستاهل تعيش معاه

دا كلام جميل جدا بس انا مش قصدى ان القلوب مش بتحب بس فى فصل الشتاء ولكن انا بقول ان الحب بفهومه العام وليس الخاص بيدفى القلوب فى الشتاء لان القلوب اللى مليانه حب مش بتكون زى القلوب اللى مش بتعرف تحب حد غير نفسها اما عن انى بحس فصل الشتاء رمز من رموز الحب فهذا احساس معين وليس قاعده . ربيع سعيد عليك ايضا وانت لازم تخالفنى فى كل بوست اقول يمين تقول شمال هههههههه انا بهرج ومرحبا بيك دائما وبتعليقاتك فى مدونتى

تحياتى




وينكى

ازيك اتمنى اشوفك يوم الخميس فى حفل التوقيع مدونات مصريه للجيب
جميل انك زيى بتحبى الشتاء وبصراحه هو فصل يتحب بكل ظواهره الطبيعيه الجميله بس زعلانه خالص عشان الربيع على فكره الربيع فى مصر مش كل ايامه تراب وخماسين انت واخده فكره وحشه اوى عنه فى ايام بيكون الجو معتدل والشمس جميله تحبى تخرجى فى هذه الايام وتسعدى بالوان الطبيعه حولك لكن الايام الاخيره فى فصل الربيع اواخر ابريل هيا اللى بتكون رياح وخماسين واتربه ومعتقدشى ان فى بلد احلى من بلدنا فى فصل الربيع وفى جوها المعتدل وشمسها الدافئه وجمال نيلها

تحياتى
نورتينى

نبضات said...

علاء سلام
وعليكم السلام ورحمة الله وبركاته
اخيرااااااا وجدت حد بيشاركنى نفس المشاعر الخوف اللى مرتبطه معى بالربيع رغم حبى له على فكره انا مره قريت مقاله فى جريده الاهرام كانت الكاتبه بتقول ايضا ان رغم حبها لفصل الربيع الا انه مرتبط معاها بذكرى قرب الامتحانات رغم انها مخلصه دراسه بقالها سنوات عديده

اما فصل الشتاء فواضح انه فصل لايختلف عليه اتنين فعلا مين منا مش بيحب الشتاء بامطاره الرومانسيه وأنوائه وتقلب أحواله حلو اوى التعبير الاخير دا
ويارب تكون كل ايامك سعاده وربيع ودائما بتنورنى بتعليقاتك الجميله

تحياتى



شيماء سمير
مرحبا بيكى فى مدونتى فى تعليقك الاول نورتينى وفعلا كل فصل وله جماله ماعدا بالنسبه ليا فصل الصيف مش بعرف اتعامل مع هذا الفصل خالص وبيجبلى اكتئاب يمكن عشان الشوارع والاماكن بتكون مزدحمه بالناس اوى
سعيده ان دعوة التصالح مع النفس عجبتك وقد ايه التامل فى الطبيعه ممكن نتعلم منه حاجات كتير

معرض الزهور انا عارفه ان الاسعار روعه وغاليه بس مش شرط الناس تزوره عشان تشترى ممكن تكون نزهه جميله وممتعه مع الاصدقاء وتشتى بس لو حاجه عجبتك اوى بس حتكون نزهه حتجدد النشاط والامل جواكى يعنى نزهه مفيده ولها تاثير على مدى طويل

كويس ان تعليقك طلع شبه التعليق السابق عشان تضيفى الاضافه الرقيقه والجميله منكى ديه وانا ايضا احببتك فى الله عشان الجمله الاخيره( فى الله ) الجميله ديه ويارب دائما تكون نبضاتى عند حسن ظنك

تحياتى

نبضات said...

حشرى
كل سنه وانت دائما طيب واشكرك على دعوتك الجميله ليا وبهديك نفس الدعوه
ودائما منورنى بتعليقاتك

تحياتى




د/ زين

اشكرك بعمق على مرورك وكلمات تشجيعك لانها اديتنى احساس بالامل والتفائل جميل جدا ان الانسان يحس ان له اصدقاء معاه فى اوقات حزنه وفرحه وكمان امتحاناته شكرا على هذه اللفته الرقيقه منك وسعيده بهذه الصداقه الافتراضيه الفضائيه

تحياتى

نبضات said...

شهر زاد
سعيده جدا بقبولك لدعوتى المتواضعه وهذا هو المطلوب ان تستطيع كلماتى ان تؤثر فيمن يقرائها لان البوست مش مجرد وصف لمشاعرى اتجاه هذا الفصل الجميل ولكن ....دعوه لكل من يقرأه لتجدد الامل والتصالح مع النفس والاخريين و ميلاد جديد لاى انسان مثلما تفعل الطبيعة

شكرا على الدعوه الجميله وبهديكى نفس الدعوه

دمت بكل الود والورد والياسمين
دائما منورانى