Sunday, February 24, 2008

بعيدا عن الأرض



بعيدا عن كوكب الارض وعندما تحلق الكلمات فى الفضاء فى حاله من تواصل الافكار والمشاعر بين البشر رغم البعد الزمنى والمكانى ورغم عدم رؤيتهم ومعرفتهم لبعض الا انك تجدهم يفهمون ويحسون ببعض اكتر من الاصدقاء على كوكب الارض .......هذا هو عالم التدوين الفضائى الجميل الذى اشعر انه اشبه بمسرح العرائس وكل مدون وله عروسه فى هذا المسرح يختار لها الشكل واللون والروح التى يتكلم بها بمعنى بيشكلها على شخصيته عشان يقدر يعبر بيها عن افكاره واحاسيسه ومعانيه التى يؤمن بيها فى الحياه ولكن...... بعيدا عن لبس الماسكات والقشرة المزيفة التى تختفى ورائها الشخصيات الحقيقيه فى مسرح الحياه


احيانا ...الكلمات بتخدع دا كلام اكيد وممكن يحدث فى عالم التدوين ايضا ولكن دائما بتخيل ان كل مدونة فى هذا العالم الفضائى بتشف شخصيه صاحبها مثل الورقه الشفافه تماما وعند دخولى لاى مدونه والتصفح فيها بكون رسمت صوره للشخصيه صاحبة المدونه يمكن لانى بحس أن هذا العالم الفضائى يتميز بالصدق والشفافيه الا حد كبير ..... بعيدا عن عالم البشر العادى الذى نتعامل معه يوميا و الملىء بالمسكات والكذب والنفاق والمظاهر الكذابه والمجاملات والمصالح.... لانه لايوجد مصلحه لاحد ان يظهر افكار غير افكاره وايضا .....كل شخصيه فى هذا العالم ليست معروفه بمعايير البشر العاديين ولكن فقط افكار الشخصيه واعماقها هى التى تظهرفى صورة الكلمات

جميل ...ان يجد الانسان اشخاص يشاركوه افكاره واحاسيسه ويشعر انهم فاهمينه وفاهمهم ويشعران له اصدقاء من نوع خاص ولون جديد للصداقه غير الصداقه بمفهومها العادى اصدقاء فى الافكار يتبادل معهم الافكار عن طريق الفضاء

سعيده جدا... بكل اصدقائى الفضائين فى عالم التدوين و بمدونتهم الممتعه وبهذه الصداقه الافتراضيه بيننا , وبكون سعيده كتير عندما تلمس أصابعى ال
للدخول فى هذا العالم سواء للكتابه او للتعليق او فى الرد على التعليقات keyboard



وختاما ....تحيه لكل اصحاب المدونات المحترمه والتى سواء بتضيف لاى شخص يدخلها شىء جديد فى شخصيته أو حياته اوبتعبر عن افكار راقيه وجميله وعميقه وحتى المدونات البسيطه التى تمتعك كلماتها واسلوبها العامى البسيط وقصائدها وموضوعتها الخفيفه ولكل من شرف مدونتى بتعليقه سواء بالنقد أو بالمدح أو بالراى
ومن يداوم على الزيارة والتعليق فى مدونتى ويارب اكون دائما عند حسن ظنكم
سعيده انى معكم وبينكم .......بعيدا عن الارض
نبضــــــات












18 comments:

مـحـمـد مـفـيـد said...

اشكر لكي كلامك الجميل وشخصك المحترم الذي ينعكس علي كتابتك
فلكي كل الاحترام والتدير

rack-yourminds said...

بجد عالم التدوين كتير جميل , المدونه :منا من يتخذها منبرا لآفكاره ومنا من يتخذها مذكرات له يبث فيها همومه ومشاكله ,ويجد من تفاعل الاخرين معه كل النصح والدعاء بأن يفرج الله كربه وحزنه ,كل هذا بعيدا عن المصلحه ودون انتظار أي مقابل ,عشان كده بنلاحظ ان المدونات فيها كثير من الصدق والآخلاص ,بجد انا سعيد بدخولي عالم التدوين ,اذ انتي اتعرفت علي ناس محترمه كتير وبجد بعتبرهم زي اخواتي ,بجد الواحد مننا بيكون سعيد جدا لما بيتعرف علي ناس محترمه وناس مثقفه بيقرأ موضوعاتهم ويقرأوا موضوعاته وكل منا يستفيد من الاخر

بجد موضوعك رااائع وبدون مجامله يا ستي هههههه

تحياتي وسلامي

سنووايت said...

بعيدا عن ارض الواقع ومن عالم التدوين الفضائي تحياتي

شهرزاد said...

لنجعل من الأوراق أجنحة تحلق نحوالسماء
بجد عالم التدوين عالم رائع وثري بالأفكار والمشاعر
سلمت يداكِ

fatima said...

نبضات الجميلة
تصورى كنت لسه بقول حاجة شبه كدا فى مدونة بنت خيخة وأى كلام ...
إحنا بنطبطب على بعض بالكتابة ..و نحضن افكارنا
بنطلع أحلى ما فينا على مدوناتنا ..
و عجبنى قوى تشبيهك بأن المدونة بتشف شخصية صاحبها
حقيقى وصف جميل للحالة ...
عارفة فيه حكمة بتقول ..
تكلم حتى أراك
يعنى الانسان بيتشاف بحق لما يفتح بقه و يتكلم و ساعتها بتعرفى حقيقته ..
دا طبعا فيما عدا البارعين فى فن الخداع
أتمنى العالم الجميل الى صنعناه لروحنا دا يفضل جميل يدوم و لا يتبدد ..
و انتى بالذات يا عرافتى الجميلة ..
اتمنى لك كل خير
حبى وقبلاتى

ashraf73 said...

شرفت بان أطأ باناملي مدونتك الرقيقه سئل احد الائمة عن هل الجسد يحمل الروح ام الروح هي التي تحمل الجسد فقال ان الروح هي التي تحمل الجسد فعالم المدونات هو غذاء روح ونتاج أرواح وتجاذب بين أرواح دون معرفة أجساد أو تلاقي بينهم دمت بود
ولتحيا العاميه ولتسقط العفاريت

§a§a said...

جميل جدا البوست

وفعلا عالم التدوين عالم جميل جدا جدا

كل مدونه بتدل على شخصيتتها واسلوبها وتختلف عن الاخرين



وفعلا بلاحظ ان كل مودونه بتختلف عن الاخر وبتضيف بعض الافكار الجديدة للشخصيه


تحياتى

الفارس الملثم said...

بداية اعجبني اسم مدونتك جدا لان النبضات دي كلمه لها وقع خاص عندي حتي كان ليا خاطرة اسمها نبضات كهربائية مش عارف حقيقي ليه انا مولع جدا بالكلمة دي

ثانيا انا في بداية دخولي عالم المدونات كنت بتصوره مجرد مكان احفظ في كتاباتي فحسب ولو حد قراها يبقي كويس جدا , لكني عندما بدأت ادخل مدونات بدات اكتشف انه عالم شديد الاتساع
ولو حبينا نصفه فهو عالم افتراضي من صنع الخيال نترك فيه العنان لافكارنا ومشاعرنا لتنطلق دون قيودوكل يوم بكتشف اشياء جديدة

عذرا للاطالة وتقبلي مروري الاول

عاليا حليم said...

عالم التدوين فعلا البلد الى لقيت فيه راحتى و ان كان يحزنى انه بلد فى الفضاء مهما كان لا استطيع استشعاره و لمسه

و ما يحزننى انه ملئ للاسف بكمية رهيبة من المجاملات قد تصل عند بعض الاشخاص لنفاق لمجرد حب الظهور فليلون فعلا الى اكتشفت انهم بيقرأوا الموضوع بتمعن و بيتناقشوا معى بدون مجاملات لمجرد انى اروح اعلق عندهم و يكسبوا عدد زيادة فى التعليق لا أكثر

زين said...

تك..تك..تك
مش هو القلب بيعمل كده..لو أنصتي أيضا للقلم ستجدينه أثناء الحركة على الورق يقوم بذلك..أما الضربات على لوحة المفاتيح فإن الفاصل فيها هو المسطرة..أنصتي لصوت المسطرة إنه قريب من دقة القلب..ولأنك تتكلمين عن هؤلاء الذين يملكون أجنحة فإن ضربات الجناح أيضا لها صوت فلاب ..فلاب..فلاب.. صوت قريب من دقة القلب..إنهم جميعا تدق قلوبهم..فإليكي على كلماتك الرقراقة الجميلة ولحسك العالي ولفنك الباهي..خالص محبتي وتقديري

Anonymous said...

انا اسعد بيكى بجد يا نبضات
وباشكر العالم التدوينى اللى عرفتك عن طريقه انتى وكل اصحابى واحبابى وعيلتى
ربنا مايفرقنا عن بعض ابدا
وربنا يجمعنا دايما على حب الخير لبعض

houda said...

islamo 3alikom samhini li ani itakhart awi fi ta3li9 3la kitabatik il aktar min jamila ou fi3lan 3alam ilfan 3alam modhich ou khososan fan ilkitaba li ano biy3abar 3an dat ilinssan ou ahasiso ou inti ihsasik 3ali ou min khilal 9irayti li lboust bita3ik iktachaf inik inssana kwayisa bkol ma3na lkalima ou ycharafni at3araf 3la hadritik ou moch 3arfa achkorik izay 3la ta3li9ik li mawdo3i ou ana batmana at3araf 3la hadriti ou batmana ykon mostafa wasal lik salami howa hakali 3la i3jabik bimawdo3 ou da charraf liya ou batmana tinawarina dayman bita3li9atik ou batmanalik itawfi9 rabina ykrimik
tahiyati

نبضات said...

محمد مفيد
شكرا على كلماتك الجميله وهذه الشهاده التى اعتز بيها جدا ولك ايضا كل الاحترام لشخصك المحترم الذى ينعكس على تعليقك

تحياتى

راك يور مايند
ازيك ياصديق المدونه ولن اتنازل عن هذا اللقب ابدا بصفتك اول من علق لى فى مدونتى من الاشخاص اللى ميعرفونيش وايضا لقرائتك المتمعنه دائما لموضوعاتى

فعلا عالم التدوين جميل جدا وانا سعيده بكل الشخصيات والمدونات اللى عرفتها عن طريق هذا العالم وحياتى فرقت كتير بعد دخولى هذا العالم

سعيده انى معكم وبينكم

تحياتى

سنووايت
كل سنه وانتى طيبه ياأميرتى الصغيره وعقبال 100سنه وانا سعيده بصداقتك الفضائيه بعيدا عن ارض الواقع ومن عالم التدوين الفضائى وموسيقى عمرو خيرت التى نشترك فى حبنا لها واحساسنا وافكارنا الانسانيه الراقيه التى نتفق معا فى التعبير عنها لتوصيلها لاصدقائنا الفضائيين

تحياتى

شهر زاد
لنجعل من الاوراق أجنحه تحلق نحو السماء تعبير رائع جدا يليق فعلا بامراءه من زمن الحب. شكرا على تعليقك وكلماتك الرقيقه وسعيده ان الموضوع عجبك مع انى فاشله شويه فى اسلوب الكتابه
انا سعيده بوجودى فى عالم التدوين لانه زى ماقلتى عنه فى تعليقك انه ثرى بالافكار والمشاعر وسعيده بمعرفة مدونات وشخصيات جميله مثلك ومثل صديقتك سنووايت وكل اصداقائى الفضائيين

تحياتى

نبضات said...

فاطيما
تكلم حتى اراك ...حكمه جميله وايضا فى حكمه اخرى بحسها اوى منطبقه على عالم التدوين وهى كل اناء ينضح بما فيه
شكرا على كلماتك الجميله وبكون سعيده لما بتنورى مدونتى بتعليقاتك والمدونات دائما بحسها بتشف شخصيات المدون صاحبها واتمنى لكى نفس امنيتك وزياده وان يعود يوسف لحضنك ولا يفارقه طول حياته
انا اسفه لو كنت فكرتك بس لما اتمنتى ليا الخير حسيت انى بتمنى لكى الخير والسعاده ولم اجد شىء ادعوا لك بيه فى اول امنياتى لك غير هذه الامنيه والدعوه

تحياتى


اشرف
تعليق وكلمات جميله ومميزه وعميقه عن عالم التدوين الفضائى بس بصراحه مافهمتش الجمله الاخيره ولتحيا العاميه ولتسقط العفاريت ؟؟؟؟؟؟؟؟؟؟؟

فعالم المدونات هو غذاء روح ونتاج أرواح وتجاذب بين أرواح دون معرفة أجساد أو تلاقي

جميله اوى هذه الجمله واسلوبك رائع بصراحه اجمل كتير من اسلوبى فى كتابه البوست

تحياتى


sasa

سعيده ان عجبك البوست لان فى ناس من اصدقائى الارضيين مش عجبهم واقالولى ان اسلوبى ضعيف جدا ومش قادرين يكملوا البوست لاخره

فعلا هو عالم جميل وكل مدونه بتشف شخصيه صاحبها وكل مدون بيضاف لشخصيته فى هذا العالم من رحلاته فى المدونات الاخرى

شكرا خاص لانك وصلت رئى لهدى وكنت سعيده جدا وانا بقرا تعليقها عندى وحاول تشجعها تعمل مدونه لان اسلوبها رائع جدا او على الاقل تنشر لها مواضيعهافى مدونتك

تحياتى

الفارس الملثم
انا اخترت اسم نبضات لكى يدل على ان كل موضوع من مواضيع المدونه عباره عن نبضه من النبضات ولانها كلمه مرتبطه بالقلب بمعنى ان تكون كلماتى فى المدونه صادقه ومن قلبى بعيده عن اى زيف او مجامله او تزويق
نبضات كهربائيه ؟؟؟!!! غريبه جدا
لان النبضات مشاعر والكهرباء شىء مادى عموما ساحاول قرائتها للتعرف عليها
عالم التدين عالم رائع لانه الا حد ما خالى من المجاملات والمصالح فقط بتتعرف على افكار جديده وبتنشر افكارك اللى بتؤمن بيها وبستمتع مع اصدقائك الفضائيين فى المناقشات وتبادل الافكار والاحاسيس
انت نورت مدونتى وان شاء الله مش تكون المره الاخيره وطول زى ماانت عاوز كانك فى مدوتك انا نفسى تعليقاتى وردودى طويله

تحياتى

نبضات said...

عاليا حليم
مش لازم كل حاجه نحبها نستطيع لمسها او استشعارها يكفيكى انك بتستشعرى صداقتى لكى فى الحياه وفى عالم التدوين

بالنسبه للمجاملات ...مممممم مش عارفه لانى مش جربت ولكن لا احب ان اجامل احد ولا حد يجاملنى ومفيش حاجه كامله فى الدنيا ممكن يكون فعلا هذا الكلام احد عيوب عالم التدوين ولكنى اشعر ان مميزاته اكتر من عيوبه

تحياتى

نبضات said...

د/زين
شكرا على كلماتك الرقيقه وتعليقاتك المميزه والتى اقرائها عدة مرات عشان اقدر احس بمعانيها الجميله المنفرده ومتاسفه عن اسلوبى فى الكتابه الضعيف
والذى شعرت بضعفه اكثر بعد قراءة تعليقك الذى جاء اكثر تعبيرا من البوست بتاعى عن عالم التدوين الفضائى

القلم والضربات على لوحة الفاتيح والمسطرة والاجنحه ...انهم جميعا لهم دقات تشبه دقات القلب

فاالقلم يكتب ويدق ليعبر عن اعماق البشر كما تعبر الضربات على لوحة الفاتيح والمسطره بدقاتها عما بداخل اصحاب الاجنحه فى هذا العالم الفضائى
انهم جميعا تدق قلوبهم

اسعدنى تعليقك المميز وسعيده اكثر بصداقتنا الفضائيه وبمعرفتى بمدونتك ...بعيدا عن الارض

تحياتى
دائما بتنورنى

نبضات said...

وينكى
شكرا على زيارتك لمدونتى المتواضعه
وانا اسعد بمعرفتك وربنا يوفقك فى كل احلامك واهدافك فى الحياه

ربنا مايفرقنا عن بعض ابدا
و يجمعنا دايما على حب الخير لبعض
ونتقابل قريب باذن الله بس ياريت تكون معانا البيدا سلامى ليها

تحياتى
نورتنى

نبضات said...

HOUDA
شكرا على كلماتك الرقيقه وتعليقك الذى اسعدنى جدا وانا اقرا كلماته الصادقه والمرهفة الحس وسعيده ان كتباتى المتواضعه عجبتك

والكتابه هى اكثر ادوات الفن تعبيرا وهذا لا ينفى وجود ادوات اخرى للفن فى التعبير كمثال الموسيقى لانها ايضا بحسها اوى من الادوات المعبره جدا

وعالم التدوين بيختلف عن اى فن اخر فى الكتابه بان كل مدون بيكتب اللى بيشعر بيه وافكاره التى يؤمن بيها ومش محتاج انه يجامل او يزوق الكلمات فمساحه الصدق فيه تعتبر الى حد ما كبيره عن غيره من فنون الكتابه لعدم وجود اى مصالح فهذا العالم.فقط من ينضم له بيكون عاوز يعبر عن افكاره ومشاعره ويتحاور مع غيره من اصدقائه الفضائين واصحاب الفكر الصادق

انا اسعد بمعرفتك ويشرفنى ايضا معرفتك يااميرتى الصغيره وتعليقك الجميل اللى نور مدونتى اما بخصوص موضوعك وبدون اى مجامله هو اكتر من رائع وبيعبر عن انسانه احساسها عالى ومثقفه وملمه بما يحدث حولها قد ايه كان موضوع جميل استمتعت بقرائتى ليه ولم اتوقع ان يوصل لك مصطفى رائى كانت مفجأه اكتر من رائعه ومتخيلتش انا ان من يكتب هذا الكلام انسانه فى مثل سنك الصغير بجد ينتظرك مستقبل فى عالم الكتابه وليس التدوين فقط واتمنى ان تعملى مدونه عشان تمتعى كل اصدقاء عالم التدوين بكتباتك وافكارك واحاسيك الفوق الرائعه وعشان اقدر ازورك فيها واعبرك عن ارائى و نتناقش او على الاقل ومؤقتا تنشرى موضيعك فى مدونه مصطفى ولكن هذا بشكل مؤقت

فى انتظار مدونتك ؟؟؟؟؟

واتمنى انا ايضا ان اتعرف عليكى وتنورينا فى اى لقاء من تجمعات المدونين

واخيرا... اسفه على الاطاله ولك كل الامنيات بالنجاح الدائم والسعاده والحب والتوفيق فى حياتك كلها وفى كل ما تحلمين به فى الحياه

تحياتى
سعيده بمعرفتك وبصادقتك