تاج أخر .........وأحلام فى حياتى

التااج مره اخرى اهداء من صديقتى الرقيقه ايمان صاحبه مدونة شخابيط ورغم انى كنت بستعد لكتابه موضوع عن الارهاب وكنت متحمسه جدا للكتابه بعد شوفت فيلم جديد فى السنيما بيتكلم عن الارهاب ومش حقول اسمه الان لأن اسمه محرج شويه لكن بيتكلم عن الارهاب من وجه اخر غير متداول وفكر عجبنى جدا ولكن ... سأجله لبعد التاج لان لايصح ان اهدى بشىء واتاخر عن تقبل الاهداء

والتاج عباره عن .... عن خمسة أحلام فى الماضى كنت بحلمهم وخمسة أحلام فى المستقبل وشخصين موجودين فى حياتى وكنت أتمنى وجودهم فى حياتى وشخصين غير متواجدين وأتمنى وجودهم

أولا خمسة أحلام فى الماضى كنت بحلمهم : كنت بحلم ان اكون باليرينه خصوصا انى كنت بتذوق الموسيقى من وانا صغيره لان ابى ايضا من متذوقى الموسيقى خصوص العالميه والغربيه فتذوقت وسمعت الموسيقى فى سن صغير وكانت بتشدنى اكتر من الاغانى والباليه مرتبط بالموسيقى فكنت بحبه وايضا زى الباليه كان بيجذبنى جدا خصوصا الشوز والتناسق بين الموسيقى وبين مرونه وحركات الباليرينه وأدائهاالتمثيلى عن طريق حركات الباليه كان شىء بيجذبنى جداا وكنت بحب مشاهده عروض الباليه اللى كانت بتعرض على القناه التانيه زمان بشكل اكبر كتير من الان او ان اكون عازفه فى الاوبرا

أحيانا كنت بحلم اكون طبيبه لانى كنت بنظر للطب على انها مهنه انسانيه من الدرجه ألأولى لتخفيف اوجاع البشر وكانت بتمنى بجانب عملى الاساسى اهتم بتخصيص بعض الوقت وايام العمل لعلاج الفقراء أو من لايملك الامكانيات الماديه للعلاج بدون اى عائد مادى او مقابل عائد مدى رمزى

أحيانا اخرى كنت اتمنى اكون دكتوره نفسيه اسمع كتيررر لهموم البشر واحاول انى اساعدهم على قد مااقدر واكون بداخلى افكار مختلفه عن انماط شخصيات البشر وفى نفس الوقت اتامل اختلافات الشخصيات وطبعا دا كان حيساعدنى كتير فى انى حفهم شخصيات الناس اللى بتعامل معاهم وبالتالى مش حكون ساذجه احيانا فى حكمى على الناس او حرسم صوره فى خيالى لشخصيات واكتشف انها غير حقيقيه وانهم خلاف مارسمت وحعالج نفسى من العصبيه والحساسيه المفرطه واحاول اتقبل واتعامل مع مختلف انماط الشخصيه وحعرف افهم اكتر فى اعماق النفس البشريه

ايضا حلم الصحافه عشان اقدر اعبر عن افكارى اللى بمؤمن بيها وعبر عن البشر واقدر اثر فى الناس بكلماتى وادافع عن دينى بشكل اكبر وعن الرسول الكريم صلى الله عليه وسلم مما يقال عليه واحاول افهم الناس دينهم بشكل اكبر واعمل لوبى اسلامى قوى لتعريف الغرب بديننا واحاول ان ازرع المبادىء والاخلاق بداخل البشر عن طريق كتابتى خصوصا الاطفال محاولة تغيير ثقافة المجتمع وتربيه المجتمع اللى اصبح اكثره غير متربى تماما ومحاربه فيروسات الفوضى وانتشار المخدرات والفساد وتوعيه الشباب بان يكون شباب مثقف وواعى وعدم الاستسلام لمحاولت الخارجيه اللى عوزانا نكون دائما مغيبين ....كنت عاوزه اتكلم عن فلسفه الحياه كلها فى كل المجالات المختلفه ومش حقول عشان خلق مجتمع مثالى ولكن محاولات للرقى بالفكر وتعاملات البشر مع بعضهم بعيدا عن الشتائم التى اصبحت الناس بتتفن فيها سواء بالتهريج مع بعض او بالسب. بمعنى.... خلق مجتمع مثقف وغير مغيب وعارف كيف يقى نفسه من محاولات اعدائه المدسوسه فى فى اشياء خداعه

اتمنيت عندما اختار شريك حياتى يكون حاله مختلفه ولست اعنى المثاليه لانى انا ايضا عندى عيوب وممكن يكون فيه عيوب وميلفتشى نظر اى حد... لكن مختلف فى فكره ويجذبنى ويخطف قلبى تكون لغتنا فى الحياه وفلسفتنا واحده حتى ولو اختلفت ارائنا ويختارنى ليس لانه وزن صفاتى مع غيرى فطبت الكافه بتاعتى ولكن ....لامتزاج افكارنا وروحنا وليس عنده بدائل فى الاختيار وعمرى مافكرت انى افرح بلبس الدبله لكن....... الاهم الاسم المحفور عليها وماذا يعنى لى

ثانيا خمسة احلام فى المستقبل

أولا : ازور الكعبه واحج وانى استطيع ان احفظ القران كله واحفظه لاولادى واستمر على القراءه الدائمه للقران الكريم

ثانيا : نفسى جدا ومن زمان وامنيه مؤجله دائما لعدم وجود مساحه وقت ليها انى اتعلم عزف بيانو او عمل درسات حره فى الموسيقى خصوصا الموسيقى العالميه والغربيه لانى بميل ليها اكتر واتعودت اسمعها اكتر من العربى ولكن بحب واتذوق الموسيقى العربى ايضا وانى امتلك لو سمحت يعنى الماديات بيانو كبير فى منزلى حتى ولو مش اتعلمت العزف لانه شكله حيكون ديكور جميل وايضا عشان اعلم عليه اولادى فى المستقبل

ثالثا :الامومه بكل مراحلها لكن بشرط الاختيار الصحيح والمناسب اولا لشريك الحياه وان لم اجد هذا الشرط ساتنازل عن هذا الحلم لانى مش حجوز لمجرد ان اكون ام

رابعا : ان تكون ماده الدين ماده اساسيه وداخله فى المجموع عشان الطلاب يهتموا بمذاكرتها وان مش اى حد يكون مدرس لازم يتعمل له اختبار هل يصلح مدرس ولا لا بمعايير محدده وان تقل الدروس الخصوصيه وتكون فى حاله الاحتياج للمساعده فقط وليس التلقين خصوصا الاطفال اللى لسه صغيرين وبياخدوا دروس وبيتعودوا عليها وبكده بنقتل قدرتهم العقليه فى التفكير مع انى كنت باخد دروس خصوصيه لكن مش بالشكل المنتشر الايام ديه اوى وكنت بكون حزينه لما بحتاج درس خصوصى وانا ضد الدرو س الخصوصيه ليس من وجه نظر الاموال اللى بتدفع ولكن عشان التلقين والطلبه يتخرجوا مش بيفهموا حاجه وان تكون الدراسه الجامعيه اكترها ابحاث وليس مذاكره من الكتب للمساعده فى خلق شخصيه وفكر المتخرجين. وان المسلمين يعرفوا دينهم كويس ومحدش يقدر يلعب فى دماغهم ويتعاملوا بما يرضى الله فى تعاملتهم معا

خامسا : ان ربنا يخلى ليا بابا وماما ويديهم الصحه وطوله العمر . وان تحرر كل الدول الاسلاميه من الاحتلال وتنعم بالحريه سواءفلسطين والعراق وكل الدول الاسلاميه المحتله وان نكون مسلمين حقا فى عبادتنا واقولنا وافعالنا

وفى حلم خاص جدا لصديقتى الغاليه فاتيما وهو ان يرجع ابنها يوسف الى حضنها الدافىء ومش يبعد عنه طول العمر بقول يارب

شخصيتين متواجدين فى حياتى وكنت اتمنى وجودهم

بابا وماما ربنا يخليهم لى دائما

شخصيتين غير متواجدين واتمنى وجودهم

بصراحه .....مش عارفه اجاوب على هذا السؤال

واخيرا دى كلها احلام ومش كلها حقائق فى حياتى ولكن حاجات وامنيات وافكار بتمناها

امرر التاج الى

جسر الحياه صديقتى فى الحياه جمعتنا الصدفه الجميله ان نعمل فى مكان واحد فكان صدفه جميله ان اتعرف على هذه الانسانه الجميله والمميزه وقربنا جدا من بعض رغم قصر الفتره لاننا فينا معانى كتير متشابهه والان سعيده بوجودها معى فى عالم التدوين

الوردتين الجميلتين والرقيقتين اللى لسه بيتفتحوا والصديقتان....سنووايت وشهرا زاد بحس انى كانى اعرفهم مش عارفه ليه واخيرا شفت شهر زاد واتمنى اشوف سنووايت قريبا وانا كتبتهم الاتنين فى نفس السطر عشان بحب صداقتهم معا وربنا يديم بينهم الصداقه ومش عاوزه افرق بينهم حتى ولو فى كتابتهم فى سطور متتاليه

مكان فى القلب لروشا القلب الكبير اللى بيضم المدونين ورفيقتى فى حضور ندوات ساقيه الصاوىو رغم ان عندها بيت واولاد لكن لما بكلمها واقولها على ندوه بتجذبنى وتجذبها بتفضى نفسها ونحضرها معا ودائما بتنورنا فى تجمعات المدونين

مصطفى الحسينى صاحب مدونة صاحب البوابه شخصيه مميزه جدا وعميقه جدا ومثقفه جدا وبيكتب فى كلام كبير ومهم بعتز بعرفته وبالحديث معه فى تجمعات المدونين وصاحب الحلم الجميل لدار الكتاب على النت وبيحلم ان يكون الكتاب فى يد كل البشر مثل رغيف الخبز وانا بهديله التاج وعندى احساس انه معندوش وقت يجاوبه كالعاده بس مش كان ينفع انى اكون بهدى التاج ومش اذكره وبعذره لسفره الكتير وانشغلاته واهتمامته المختلفه فى الحياه اللى بتخليه دائما مش فاضى و حتى مش بيرد على التعليقات فى مدونته

مندهش اخى العزيز صاحب مدونه رساله من تحت الماء انا اهديته التاج اللى فات وبهديله التاج مره اخرى مع ان دا مخالف لشروط الاهداء لكن السبب رخامه عشان هو كان مضايق جدا من التاج اللى فات مع ان المفروض يفرح لان لما حد يهدى له تاج بيكون دليل على المعزه ومش كان عارف يكتب ايه ولما اهداه لخمسه مش كتب اسباب الاهداءو لخصهم فى كلمه واحده ان السبب رخامه عشان كده ورخامه على رخامه يا على انا بهديك تاج تانى واياك مش تجاوب عليه

وبهدى التاج لاى حد يتقبل اهدائى له من زائرى نبضات العزاز جدا للاجابه عليه يعتبرنى اهدته له

نبضـــــات

من انا ؟؟؟؟

وعدت من جديد وبعد اجازه طويله بعيده عن التدوين سأبدا تدويناتى الجديده بال... التـــاج اللى اهدته ليا صديقتى العزيزه فاتيما واشكرها جدا على هذا الاهداء مع انه صعب جدا ان انسان يتسال انه يذكر 10 حاجات عن شخصيته

عموما ححاول بس يارب اوفق وتقدر اجاباتى انها تعبر عن شخصيه .....نبضات

اولا هوياتى : بحب القراءه جدا فى كل المجالات والاستماع للموسيقى الكلاسيك والعالميه والخفيفه فى البرنامج الموسيقى بالراديوا وعندى مكتبه من شرائط الموسيقى وكتبى المفضله وكتبى ايام الدراسه واللى بعتبرهم كلهم ثروتى فى الحياه وحضور الندوات فى المواضيع اللى بتهمنى وبتجذبنى والمعارض الفنيه ومشاهدة عروض الباليه والتامل فى الطبيعه والحياه وتحليل شخصيات البشر اللى بتعامل معهم فى الحياه ومستمعه جيده لكل من يحتاج انه يففض معى

ثانيا اشهر عيوبى : شخصيه عصبيه جدا رغم انه مش بيبان عليا فى الوهله الاولى او لما حد بيتعرف عليا جديد والناس بتستغرب لما اقول انى عصبيه ومش بتصدق وبعد فتره من الاحتكاك بيتاكدوا بالادله القاطعه انى عصبيه جدا

حساسه جدا بشكل يجعلنى صعب التعامل معى لان فى حاجات صغيره وبسيطه بتكون بالنسبه لى قاتله بس برده فى حاجات بعديها المهم ان شخصيتى بتفرض على كل من يتعامل معى اسلوب معين فى التعامل والناس اللى مش بتهتم بذلك مش بعرف اتعامل معها وبالتالى مش بيكونو قريبين منى او بتعامل معهم فى الضروريات واحيانا بقطع علاقتى نهائى بيهم ودا بيخلنى اخسر ناس كويسه بس مشكلتهم انهم مش عارفين يتعملوا مع حساسيتى وشخصيتى الصعبه

ثالثا حاجات بكرها جدا : النفاق والمظاهر الكذابه او المظاهر عموما والسطحيه فى النظر الى اى شىء فى الحياه لانى اتعودت فى حياتى ان انظر لاى شىء فى عمقه ولا انظر الى القشره المزيفه ممكن تكون المظاهر مطلوبه لكن فى حيز ضيق جدا - المجاملات ممكن اكون بجامل بس ايضا فى حدود ضيقه ومش بحب حد يجاملنى ولا بجامل حد بس فى نفس الوقت باخد بالى من كلامى انه مش يجرح حد بقليل جدا من المجاملات

رابعا حاجات بحبها اوى ومش بمل من تكررها : بحب اشوف الدنيا وهيا بتفتح الصبح واتامل السماء وهيا بتتغير لونها واسمع صوت العصافير اول ماتنور الدنيا واستمر فى المشاهده الى طلوع الشمس وبحس ان هذا المشهد الجميل من اجمل لحظات الحياه ويشعرنى بالسعاده والامل وانى بشوف يوم جديد وهو بيتولد واليوم اللى بصحى فيه من الفجر اصليه واتفرج على هذا المشهد بكون طول اليوم حاسه بتفائل ونشاط وسعاده - بحب النيل جدا-حضور الحفلات الموسيقيه لعمرو خيرت فى ساقيه الصاوى والاوبرا - القراءه لعبد الوهاب مطاوع- قراءة اعداد مجلة البيت للديكور الشهريه - قراءة مجله العربى الشهريه -الجلوس مع صديقاتى وتجمعات المدونين فى ساقيه الصاوى -مشاهده فيلم الانسان يعيش مره واحده -التناسق بين الوان اللبس والاكسسورات والمكياج والذوق الرفيع فى اختيار الملابس -الاحتفاظ بالشخصيات الجميله اللى بقبلها فى حياتى وبتكون زى الجواهر

مشاهدة افلام الفنانه فاتن حمامه والتى احبها جدا- الاستماع الى اغانى فيروز

خامسا سؤل بيستفزنى جدا ؟ انتى ليه مش مرتبطه لحد الان ؟ وتقريبا السبعين مليون بيسالونى هذا السؤل والمفروض انه حياتى الخاصه اما الاقربين بيسالونى حنفرح بيكى امتى ويتهمونى بالبحث عن شخصيه مثاليه غير موجوده

وانا دايما برد انى مش بيهمنى المثاليه ولكن حد يجذبنى ولو فيه عيوب ولما اجده مش ححتاج عزومه من حد

سادسا امنيتى فى الحياه : انى اقدر اداوم واحافظ على الصلاه فى اوقتها والا تشغلنى الحياه عن المدوامه على قراءة

القران وانى اعرف أتوضأ واصلى فى اى مكان فالصلاه والقران هو كنز الانسان واهم حاجه فى الحياه

سابعا حاجه مؤمنه بيها جدا : ان الحياه عباره عن اختبار قصيرفمهما كثرت اختبارات الحياه علينا ان نرضى بقلوبنا عن كل المكتوب ونتذكر دائما انه ليس مهم ان نكون سعداء فى الدنيا ولكن الاهم هو الاخره ولازم نعمل حساب اننا محاسبون عن كل شىء ونحاول ان ننجح فى اختبارات الله لنا فى الدنيا

ثامنا اكثر حاجه فاشله فيها: المطبخ مابعرفشى اطبخ خالص ولا اغسل الاطباق بس فى امل انى اتعلم الطبيخ لانى بحب انى افنن فى الاكل وبحسه هوايه جميله بس المشكله معنديش وقت لتعلم الطبيخ بس مش بكرهه لكن غسيل الاطباق دا المستحيل الا لو لبست فى يوم من الايام جوانتى وانا بغسل عموما انا عمرى ماغسلتها ومعتقدشى انى حغسلها

تاسعا وظيفه بحبها : بصراحه او لم اكون محاسبه كنت اتمنى اكون عازفه فى الاوبرا او مؤلفه موسيقيه مثل بتهوفن وعمرو خيرت وخالد حماد لانى بحب الموسيقى جدااااااااااااااااا

عاشرا واخيرا وصلت للنهايه مثلى الاعلى فى الحياه : الكاتب عبد الوهاب مطاوع الله يرحمه والذى اقراء له منذ كان عمرى 15 سنه والذى شكل كتير من افكارى وشخصيتى ووجه نظرى فى اشياء كثيره فى الحياه ومن بعد وفاته اصبحت لااستطيع قراءه بريد الجمعه فى جريده الاهرام لانه ترك مساحه صعب ان شخص يملائها لانه كان اكتر من فيلسوف وليس مجرد انسان بيكتب حلول للمشاكل وكان بيختار مشاكل فعلا تستحق القراءه وليس كما هو موجود الان من نشر مشاكل شخصيات مريضه وغير جديره بنشر مشاكلها او بالرد عليها ومن اجمل كتب عبد الوهاب مطاوع اللى بعتز بيها جدا وقراته اكتر من 10 مرات كتاب افتح قلبك

امرر التاج الى

عاليا حليم مدونة عندلبيات لانها سبب معرفتى بهذا العالم الافتراضى وتشجيعى على دخوله والوقوف جنبى فى خطواتى الاولى فى التدوين وصديقتى فى التدوين والحياه ومن الناس القريبه جدا من قلبى

انا اكان نفسى امرره لمدونة تسابيح لدكتور زين بس فاتيما مررته له قبل كده ولكن هو لسه مش جاوب عليه فاتمنى ان يقبل اهدائى مع فاتيما انه يجاوب عليه . مدونه تسابيح اول معرفتى بيها عن طريق بوست جميل باسم ترنيمات صغيره عن الموسيقى حسسنى انها كتير مختلفه وجميله فى تاملتها الفلسفيه الجميله والعميقه وشاهد على حياه لا يعرفها احد وبعتز جدا بمعرفتى بيها

مدونة راك يور مايند اول شخص من المدونين علق عندى فى المدونه من الناس االلى معرفهاش وكان دائما يقرا مواضعى باهتمام مما كان ينعكس فى تعليقاته عشان كده كنت دائما اقوله صديق المدونه ومن الشخصيات اللى بعتز بيها

مدونة غمض عينيك اول شخص كتب عن نبضات وكان فى بوست عن تجمع للمدونين فى فطار رمضان فى ساقيه الصاوى وحكى فيه عن الشخصيات اللى حضرت هذا الاجتماع وكنت لسه ماكتبتش اى حاجه فى مدونتى وكتب عنى باسم نبضات تعليق جميل جدا مازلت اتذكره ومن الشخصيات اللى بعتز بمعرفتها

مدونة ارجوحة القلب مدونه دخلتها صدفه وفكرت فى تعليق معين اكتبه لان افكارها عجبتنى وجدتها قريبه لحد كبيرمن افكارى رغم اختلاف مواضيعنا ونظرت فى البروفيل وجدته نفس البرج بتاعى ونفس سنه ميلادى وبعدين اتشغلت وقلت اعلق فى يوم تانى وبعديها بفتره وجدته معلق فى مدونتى تعليق مشابه للتعليق اللى كنت حكتبه عنده عن علاقه تشابه الافكار والابراج وكانت صدفه غريبه جدا ومن المدونات اللى بعتز بيها

مدونة رساله من تحت الماء للمدون مندهش شخصيه بعتز بيها جدا فى عالم التدوين واخ وصديق عزيز واهم مايميزها الشفافيه وكان من الشخصيات اللى اتكلمت معاها كتير فى اول تجمع للمدونين فى فطار رمضان

مدونة حكايات زمان للمدون مصطفى والمدونه الرقيقه والجميله هدى مدونه متميزه جدا وبعتز بمعرفتى بيها وباصحابها اللى بعزهم جدا وسعيده بالصداقه الفضائيه اللى بتجمعنى بيهم ومدونتهم اللى دائما بستمتع بمواضيعها المميزه

وعلى فكره التاج منفصل بمعنى ان كل من مصطفى وهدى يجاوب عليه لوحده واشكركهم على تعليقاتهم الى بتنور مدونتى وقلقهم عليا فى غيابى

انا نفسى امرره لناس كتير بس فاتيما مشترطه عدد معين ولكن اى حد من زوار المدونه يقبله منى انا بهديه له ولو كان ينفع اقدر اذكر كل اسماء المدونات العزيزه عليا كنت ذكرتهم كلهم

:

:

:

:

تحديث

شكر خاص ... كل من قبلوا اهدائى للتاج وجابوا على التاج واستمتعت وسعدت جدا باجابتهم واولهم دكتور زين ثم مندهش وهدى ومصطفى وعاليا حليم اعتذرت انها مش حتقدر تجاوبه هذه الايام وحتأجله شويه بس وعدتنى انها حتجاوبه اما غمض عينيك وراك فاانا عارفه ظروفهم ومنتظره اجابتهم عن التاج فى اى وقت

ومدونة ارجوحه القلب لصاحبها ثروت للى مش عارف يكتب ايه وعموما عذر مقبول لحد مايجد وقت وكلمات معبره لاجابه التاج

نبضـــــات

حب فى الشتاء وطبول الربيع

فى هذه الايام تحتفل الطبيعة بقدوم الربيع حيث تتلون بالالوان الزاهيه وتولد الطبيعة من جديد تخضر اوراق الشجر التى جفت وتساقطت وتتفتح الزهور وتكتسى الاشجار بالورود مختلفة الالوان ، تقترب الشمس أكثر وتصبح أشعتها أكثر أشراقا وايامنا اكثر دفئا فتظهر الطبيعه وكانها لوحة زيتيه مرسومه بل اجمل اللوحات لانها من خلق الخالق العظيم

أنه الربيع ...الذى لايخلف موعده مهما طالت ليالى الشتاء و ومهما سيطرت على قلوبنا الاحزان ياتى ويلون الكون

بألوان الحب والتفائل ورغم كل هذا الجمال الا أن فصل الربيع دائما يصاحبه معى لمسة حزن داخليه لانتهاء فصل الشتاءوافتقادى لهذا الفصل بصفتى كائنه شتويه اعشق فصل الشتاء بشمسه الدافئه وزخات مطره الصافيه مثل قطرات الندى فى الصباح والذى لايمنعنا طقسه البارد من الاحساس الداخلى بالدفىء فالشتاء بارد لمن لايملكون قلوب مليئه بالحب والاحساس وذكريات الحياه فهو رمزا من رموز الرومانسيه والدفىء ولغه من لغات الحب اذا اردنا ان نتكلم عنه

ويذكرنى قدوم فصل الربيع بشعور متزامن معه بالخوف لذكرى دائمه فى خيالى لانه كان دائما ياتى مع قرب الامتحانات

وبدء الاستعداد لها فأول ماتبدء الزهور فى التفتح والاشجار تكتسى بالورود كلها علامات عندى لقرب الامتحانات عندما كنت طالبه فى الدراسه ورغم انتهاء دراستى الا انى مازلت اتذكر هذا الاحساس داخلى كلما اتى الربيع

ايام الربيع هى افضل مناسبه لتجدد الامل والتصالح مع النفس والاخريين وليكن ميلاد جديدا تماما لنا مثلما تفعل الطبيعة

فهى دعوه مفتوحه تاتى مع قدوم الربيع لكل البشر للتخلص من الكابه والاحزان والتخفف من الاعباء والضغوط ومشاكل الحياه التى تسرق الابتسامه من على الشفاه ولو لبضعة ايام نتذكر فيها انه مهما ضاقت بنا ظروف الحياه لابد لها ان تنفرج ومهما اشتدت ألام الجروح لابد لها أن تشفى ،وتلتأم المهم ان نساعد انفسنا على نسيان كل ماأتى موعد نسيانه

فقط علينا ان ننظر للجمال من حولنا فى كل شىء فى الطبيعه وفى كل شىء فى الحياه ولنتغاضى عن القبح

واذا كان هناك كذب وخداع وخيانه ونفاق وانانيه وقسوة فى قلوب البشر ، الا أن هناك ايضا الصدق والحب والوفاء والاخلاص والحنان والعطاء بلا حدود فمع المر هناك الحلو ولكن علينا ان نبحث عنه طوال حياتنا ونتمسك بيه عندما نجده ونفسح له داخلنا وفى قلوبنا المكان الذى يستحقه

واحتفالا بعيد الربيع ...يقام معرض لزهورالربيع هذه الايام فى حديقة الاورمان بالجيزه وحتى 22 ابريل الحالى والذى يشارك فيه العديد من الشركات العارضه والمشاتل لمحبى اقتناء الازهار والنباتات او من يرغب فى اختطاف وقت جميل

فى نزهه فى هذا المعرض لتتمتع بالوان الطبيعة فى الربيع

نبضـــات