Monday, February 18, 2008

حبيبتى من تكون


شكر خاص لصديقتى الغاليه فى الحياه وفى عالم التدوين الفضائى الجميل ...... عاليــا حليـــم ومش عارفه اشكرك على ايه ولا ايه بس احساس جميل ان الانسان يكون عنده صديق قلبه كبير زى قلبك ويقدر يستامنه على مفتاح
ركنه الخاص ويحس بالامان ان مفتاح ركنه الهادىء فى يد امينه كانها فى يده تماما
فهى ليست يد عاديه ولكنها ريشة فنانه رقيقه استطاعت ان ترسم رتوش جميله ورقيقه لركنى وقوقعتى الخاصة
شكرا على كل التجديدات والرتوش الجديده فى المدونه ومن غيرك مش كنت حعرف اعمل اي حاجه بعد محاولتى الفاشله لعمل موسيقى مصاحبه لمدونتى


خلى بالك من عقلك .....ارق واجمل واعذب مقطوعات الموسيقار عمرو خيرت والتى تمنيت منذ بدايتى فى عالم التدوين أن تكون الموسيقى المصاحبه لمدونتى نبضات ..... لاننا اذا اردنا ان نتخيل الجمال فى اكمل صورة فيكفينا ان نستمع الى الموسيقى الجميله والجمال فى حياتنا بالوانه المختلفه هو احد الاركان الرئيسيه واللمسات التى احاول ان اتكلم فيها او اجعل لها بصمات فى مواضيعى


وعلى فكره ....موسيقى المدونه هى موسيقى هاتفى المحمول التى لااغيرها وبعتز بيها جدا لانها من اقرب النغمات لقلبى واتمنى ان يستمتع زوار المدونه بالموسيقى المصاحبه ليها وان تعجبهم الرتوش الرقيقه للفنانــه التشكيليه
عــــاليا حــــــليم لان عاليا فنانه وصحفيه قبل أن تكون مدونه عشان كده دائما عندلبيــات مميزه

شكرا على توقيعك الرقيق فى مدونتى الذى اسعدنى كتير وشرف كبير لمدونتى كلماتك الرقيقه

وطبعا ساختم هذا البوست اللى بهديه إلى عـاليا حليـم بان اهديها اغنية العندليب

حــــبيبتى مــن تـــــكون

ومش ناسيه ادعيلك ياعاليا الدعوه اللى بتحبيها ودائما فى قلبى .....بحبك



نـبضــــات



14 comments:

Unknown said...

الشكر لوحده مش كفاية .. لكن مش غريب عليكى يا اعز صديقاتى امال انا حبيتك ليه ؟ و بعدين العنوان كده ما بقاش ليه معنى حبيبتك انا خلاص مش كده و لا ايه ؟ :))))))

و انا سعيدة ان الديكورات الجديدة عجبتك الحمد لله ما احنا ذوقنا واحد .. قليل جدا ما اختلفت معاكى يا عزيزتى حقيقى انتى الابتسامة الحقيقية المخلصة فى حياتى و حقيقى انتى هدية من ربنا بحمده دايما عليها

اسمحى باه اهديلك انا عندليبة بحبها اوى اسمها ( كفاية نورك عليا ) و ركزى مع الدعوة الى انتى عارفها اهى كده الصداقة و لا بلاش
عين بتغمز

فاتيما said...

نبضات الحبيبة
العود أحمد ياستى
و مبروك على التجديدات الجميلة .. و المزيكا ..انا كمان فشلت فشل ذريع انزل مزيكا على مدونتى ومدونة يوسف ..بس المحاولات مستمرة لغاية ما هاجيبها برضو ..
الصداقة أغلى كنز ممكن تملكيه ... و لو ضاع تندمى عليه ندم ما يخلصش بالعكس يزيد ...
ربنا يديم صداقتكو دايما
و هااابى فالنتين داى ليكى ولعاليا
قلب بيحبك أكتر

صاحب المضيفة said...

جميل ان الواحد يكون له صديق بيستأمنه على خصوصياته

وجميل ان الواحد ده بيحسسك انه جزء منك وانت جزء منه

ربنا يديم محبتكم بعض

دمت بخير

احساس لسه حى said...

عزيزتى
الاستاذة عاليةانسانة رقيقة ومليان طيبة وحب نحيت كل الناس

على العموم لقينا اللى نطلب منه لما نزنق فى حاجة فى البلوج

تصدقى عالية الانسانة الوحيد اللى انتقدتها مرة وقبلت انتقادى بمنتهى الذوق والادب

وطبعا قيمة الانسان بتزيد لما نقارن تصرفاته فى مواقف ونقارنها بتصرفات غيره

عالية تستاهل بصراحة اكتر من بوست فى اكتر من مدونه
تحياتى
سلام

rack-yourminds said...

الاخت عاليا بجد انسانه كتير طيبه وكتير رقيقه,وانتي كمان يا ستي برده كتير طيبه ورقيقه ,عشان كده ربنا جمعكم ببعض ,ربنا يديم صداقتكم ويخليكم لبعض

بجد الموسيقي في منتهي الجمال وشكل المدونه بقي جميل جدا ,يا عيني دانا مدونتي غلبانه خااالص وسيبها كده بدون تجديد هههه

وبعدن يا بنتي فين موضوعاتك الجديده الجميله ,بطلي كسل بقي ههههههه ,ونزلينا موضوعات جديده

تحياتي وسلامي

Unknown said...

أحساس لسة حى :)
راك يور مايند :)

يا جماعة و الله انتوا بتحرجونى بكلامكم الدائم عنى ده و اتمنى ان اكون دايما عند حسن ظنكم و انتم الاتنين انا بحس ان كلامكم بيبقى من قلوبكم فعلا بعيدا عن المجاملات و الميوعة الفظيعة اللى اكتشفتها بصراحة فى عالم التدوين

الف شكر

و اظهرى باه يا هانم ما تنسيش موعدنا فى فيلم طباخ الريس يوم السبت زى م اتفقنا التليفون عندى اصله لسة بايظ

الملاح التائه said...

بداية أشكرك على تعليقك فى صومعة الملاح التائه وعلى كلماتك الصادقه به
ثانيا أضيف الى كلماتك عن موسيقى عمر خيرت انها وصلت لدرجه من الرقى تجعلنا نشعر أنها أشبه بالتحف العبقرية التى أنتجتها مختلف الحضارات فنقف أمامها منبهرين مأخوذين بهذا السحر وذاك الجمال
ثالثا تحياتي للصداقه حين تكون بهذا الجمال وحين تصبح بتلك القوة وحين تغدو بتلك الصورة الطيبه
وتحياتي لصديقتك
ولك أيضا
دمتم جميعا فى حب دائم لا ينقطع

سنووايت said...

خللي بالك من عقلك من أروع موسيقي عمر خيرت اللي هي كلها رائعه

شهرزاد said...

ماشاء الله ربنا يديم هذه الصداقة الجميلة
أحسنت الاختيار في كل شئ وبالفعل موسيقى عمر خيرت لديهاالقدرةعلى زرع الأحاسيس بداخلنا في أي وقت

MONDAHESH said...

يا حظ يا حظ


مش عارف احسد ولا احقد ولا اعمل ايه


:)))

ربنا يخليكوا لبعض دايما

وبصراحة انتوا الاتنين اجمل من بعض

نبضات said...

عاليا حليم
شكرا لكلماتك الرقيقه يااحن وارق الصديقات وانا بقول حبيبتى من تكون على راى الفنان عبد الحليم لما غنى حبيبتى من تكون هو كان عارف هو بيحب مين بس كان بيقول كده عشان سؤل دائما الناس بتساله ليه عشان كده سميت البوست حبيبتى من تكون وكمان عشان الاغنيه دية بحبها وبحب كلماتها وموسيقتها الرائعين فحبيت اهديهالك
بجد ياعاليا انت انسانه انا كمان بحمد ربنا انى عرفت انسانه زيك وسعيده جدا بصادقتنا وانت كمان ابتسامه حقيقيه مخلصه فى حياتى بقول يارب تفضل معى على طول
اما الدعوه بجد بدعيها من قلبى والدنيا بتمطر الان وانا بعلق لك وبدعيهالك فى المطره ربنا يسعدك لانك تستحقى السعاده

تحياتى
على ميعادنا السبت الساعه 11 وانا مش حتاخر

نبضات said...

فاطيما
نورتينى بجد سعيده ان التجديدات عجبتك اما عن الموسيقى فهى من اوائل المقطوعات التى لفتت نظرى ولمست قلبى لعمرو خيرت ومن خلال هذه المقطوعه عرفت اسم عمرو خيرت وليها مكانه كبيره جوايا اوى وموسيقى موبيلى اللى مش بغيرها خالص
وبصراحه عمليه وضع موسيقى للمدونه عمليه صعبه انا من زمان بحاول وفى الاخر فشلت فشل زريع لولا انى طلبت الاستعانه بانتمتى فى الحياه والتدوين عاليا على فكره انا بهديكى دعوه لزيارة مدونتها حتعجبك كتير ويمكن كمان مش تبصى لنبضات خالص بعد ماتعرفى عندلبيات وهى السبب فى دخولى عالم التدوين وانى بينكم الان
شكرا على الدعوه الجميله
ولا بتاخر فى الكتابه بيبقى غصبن عنى عندى دائما أزمه فى الوقت وبحب اكتب بذهن صافى عشان اكتب من قلبى وليس مجرد كتابه سد خانه او لمجرد الكتابه

تحياتى
قلب بيحبك
دائما بتنورنينى

نبضات said...

صاحب المضيفة
فعلا عاليا من الناس القريبه لقلبى ولى بستامنها على اى شىء فى حياتى وهى جزء منى خصوصا ان أذوقنا وافكارنا فى الحياه متشابهه لحد كبير وهى تستاهل اكتر مما كتبت بكتير لانها انسانه رائعه بجد وقلب كبير ورقيق كله حب

شكرا على دعوتك لصادقتنا

تحياتى
دائما منورنى
مبروك الخطوبه وعقبال الزفاف
وتبقى تعزمنا




أحساس لسه حى
فعلا عاليا انسانه رائعه وانا سعيده جدا بان من اصدقائها المقربين بصراحه دا شرف كبير ليا
واى حاجه تحتاجها من عاليا بالنسبه للبلوج عاليا فنانه تشكليه ذوقها عالى بس تبقى تحاسبها بقه لانى صديقتها فمفيش بنا حساب لكن مش معقوله يعنى لازم برده نكسبها مينفعشى كده
هههههههه
على فكره انا بزو مدونتك بس لم اجد تعليق بداخلى اكتبه ومش بحب اكتب مجرد كلمات وفى انتظار ان تكتب شىء اجد عندى تعليق عليه بس مش قاصدى حاجه بجدوارجوا مش تفهم صراحتى غلط انا عارفه انى مش بجيد فن التعليق وبقول اللى جويا من غير ترتيب كلام... بس انا عوزاك تعرف انى زرت مدونتك وان شاء الله اعلق لك قريب. بس انا فاشله شويه فى حكاية التعليقات ديه

تحياتى
دائما بتنورنى




الملاح التائه

انا بسمع لعمرو خيرت من ايام ماكنت فى الصف الاول الاثانوى يعنى متربيه على موسيقته وعارفه قد ايه هى جميله حتى اصبحت فى تكوينى

بالنسبه للتعليق عندك ارجوا ان تكون كلماتى افادتك بجد والموضوع مش صعب بس محتاج أراده وعلى فكره انا دايما بنصح نفسى وبقولها نفس الكلام اللى كتبته عنك
شكرا لكلماتك الرقيقه

تحياتى
دائما بتنورنى

نبضات said...

راك يور ميند
اولا اسفه جداااااا ياصديق المدونة والله مش اخدت بالى فى ترتيب الرد على التعليقات معلشى اصلى بعلق والدنيا متمطر على اخرها بره دا اكيد تاثير المطر أرجوا قبول أعتذارى
عاليا انسانه رائعه ويمكن كمان انا عرفها اكتر منكم لاننا اصحاب خارج التدوين وفى التدوين ايضا
سعيده ان التجديدات عجبتك

بخصوص الموضوعات الجديده والله الموضوع مش موضوع كسل ولكن المشكلة ازمة الوقت + صفاء الذهن عشان اقدر اكتب من قلبى ممكن اكون مش بكتب كتير بس بتمنى انى لما اكتب حاجه تكون من قلبى وتوصل لقلبكم وتكون نبضه من نبضات مدونتى نبضات

تحياتى
دائما بتنورنى



سنووايت

بصراحه خلى بالك من عقلك من ارق واجمل مقطوعات عمرو خيرت وطبعا كل مقطوعاته جميله بس هى من اقربها الى قلبى وايضا موسيقى مدونتك من اقرب المقطوعات لقلبى
تحياتى على اسم مدونتك الرقيق الثلج الابيض والذى يعكس الشفافيه ومعانى كتير سواء فى السم او فى الشخصيه الكرتونيه التى تمثلها سنووايت ومن احب الشخصيات الكرتونيه لقلبى

تحياتى
نورتى مدونتى



شهر ذاد
شكرا على دعوتك الجميله لصداقتنا وسعيده ان الموسيقى عجبتك وفعلا موسيقى عمرو خيرت لها بصمه على شخصيه اى انسان يسمعها وبتزرع احاسيس جميله ومرهفه فى اعماقنا

تحياتى
نورتنى



مندهش

ازيك يامحامى يارب دائما تكون بخير وفى احسن حال وربنا يخليك وشكرا لكلماتك الرقيقه بجد بتنورنى وبكون سعيده بتعليقك عندى لان من الشخصيات اللى فعلا سعيده بمعرفتها
ومش خايفه من الحسد ولا الحقد هههههههه لان اللى عنده قلب رقيق واحساس عالى زيك مش بيعرف يحسد ولا يحقد

تحياتى
دائما منورنى